O‘zbekistonda nogironligi bo‘lgan shaxslar ham DXMda ishlashi mumkin bo‘ladi

Davlat xizmatlari markazida nogironligi bo‘lgan shaxslarga mos keluvchi lavozimlarda ishlashi uchun qulay sharoitlar yaratiladi, deb xabar bermoqda Telegram’dagi “Huquqiy axborot” kanali.

Qayd etilishicha, prezident “Nogironligi bo‘lgan shaxslarni har tomonlama qo‘llab-quvvatlash, ularning bandligiga ko‘maklashish hamda ijtimoiy faolligini yanada oshirishga oid qo‘shimcha chora-tadbirlar to‘g‘risida”gi qarorni imzoladi. Unga ko‘ra, 2022-yil 1-martgacha har bir hududda bittadan DXMda nogironlarning ularga mos keluvchi lavozimlarda (operator, konsultant, inspektor va boshqalar) ishlashi uchun qulay sharoitlar yaratiladi.

2022-yil 1-sentabrgacha mazkur amaliyot barcha DXMda joriy qilinadi. 2022-yil 1-iyuldan Bandlikka ko‘maklashish davlat jamg‘armasi mablag‘lari hisobidan nogironlarni qo‘llab-quvvatlovchi nodavlat ta’lim tashkilotlariga BHMning 200 baravari miqdorida ijtimoiy buyurtma mablag‘lari ajratiladi. Kelasi yildan nogironlarni kasb-hunarga o‘qitish bo‘yicha grant miqdori kamida 2 baravarga oshiriladi.

Nogironlar hayotini yaxshilashga qaratilgan eng yaxshi ijtimoiy loyihalarni rag‘batlantirib borish maqsadida 2022-yildan quyidagi nominatsiyalar bo‘yicha respublika tanlovlari tashkil etiladi:

• Iqtisodiy taraqqiyot va kambag‘allikni qisqartirish vazirligi tomonidan — “Eng yaxshi ijtimoiy loyiha”;
• Savdo-sanoat palatasi tomonidan — “Eng yaxshi tadbirkor”;
• Oliy va o‘rta maxsus ta’lim vazirligi tomonidan — “Eng yaxshi talaba”;
• Turizm va sport vazirligi tomonidan — “Eng yaxshi sportchi”;
• Madaniyat vazirligi tomonidan — “Eng yaxshi kitobxon”;
• Bandlik va mehnat munosabatlari vazirligi tomonidan — “Eng yaxshi ish beruvchi”.

Avvalroq O‘zbekistonda har yili 500 nafargacha nogironligi bo‘lgan yoshlarga subsidiya ajratilishi xabar qilingandi. Shuningdek, O‘zbekistonda bolalarga nogironlikni pediatriya tibbiy-ijtimoiy ekspert komissiyalari belgilaydigan bo‘lgani ma’lum qilingan.