Фарғона вилояти Ўзбекистон туманида 19 декабрь куни ўсмир ўзганинг машинасини ўғирлаб кетди. Бу ҳақда Тергов департаменти хабар қилмоқда.
Маълум қилинишича, шу куни соат 08:30 атрофида Ички ишлар органига туманнинг Бунёдкор кўчасида яшовчи Т.Д. (1988 йилда туғилган) қўнғироқ қилган. У ўзининг «Москвич» машинасини яшаш хонадони олдида номаълум шахс олиб қочгани ҳақида хабар бериб, транспортни топиш ва қонунбузарга қонуний чора кўришни сўраган.
Олиб борилган терговга қадар текширув ҳаракатлари натижасида жиноятни вояга етмаган К.М. (2004 йилда туғилган) содир этгани аниқланган. У автомашинани 3 километр масофагача бошқариб бориб, Даштҳасан кўчасида жойлашган «Ваҳобжон ота» чойхонаси ёнига ташлаб кетган.
Қонунбузар билан бир қатор тергов ҳаракатлари ўтказилганда у шу куни спиртли ичимлик истеъмол қилгани аниқланган. Ўсмир автомашинани очиқлигидан фойдаланиб, калит танлаш йўли билан ўт олдирган ва олиб қочиб кетган.
Ҳолат юзасидан К.М.га нисбатан Жиноят кодексининг 267-моддаси 2-қисми «а» банди (транспорт воситасини олиб қочиш; такроран ёки хавфли рецидивист томонидан) билан жиноят иши қўзғатилиб, процессуал тартибда ушланган. Ҳозирда тергов ҳаракатлари давом этмоқда.
Жиноят кодексига кўра, мазкур жиноятни содир этган шахс ўн йилдан ўн беш йилгача озодликдан маҳрум қилиш билан жазоланади.
Изоҳ (0)