2021-yil noyabr oyida O‘zbekistonda ko‘chmas mulk oldi-sotdisi bo‘yicha 22,5 mingta shartnoma tuzildi. Bu haqda ko‘chmas mulk bozoridagi talab o‘zgarishlarni doimiy ravishda tahlil qilib kelayotgan Iqtisodiy tadqiqotlar va islohotlar markazi ma’lumotlarida keltirilgan. Ta’kidlanishicha, tuzilgan shartnomalar soni sentabr oyiga nisbatan 4 foizga (21,6 ming) ko‘p demak.
Qayd etilishicha, mazkur ko‘rsatkichning 2020-yil (14,4 foiz) va 2019-yil (40,6 foiz) noyabr oylariga nisbatan keskin o‘sishi uy-joy bozorida talabning hali ham juda balandligidan dalolat beradi. Eng yuqori o‘sish sur’atlari Surxondaryo (22,9 foiz), Namangan (17,3 foiz), Xorazm (14,3 foiz) viloyatlarida kuzatilgan bo‘lsa; Andijon (14,1 foiz), Samarqand (6,6 foiz) va Toshkent (3,7 foiz) viloyatlarida kamayish kuzatilgan.
Noyabr oyida oktabr oyiga nisbatan ikkilamchi bozorda o‘rtacha uy-joy narxlari 1,2 foizga o‘sgan. Narxlarda eng katta o‘sish Toshkent (3,2 foiz), Samarqand (3,1 foiz) va Xorazm (3 foiz) viloyatlarida kuzatilgan bo‘lsa, Navoiy (-1,4 foiz) viloyatida uy-joy narxlari pasaygan.
Shaharlar kesimida uy-joy narxlarining eng baland qiymati Toshkent (1 kvadrat metr uchun 753 dollar), Samarqand (553 dollar) va Navoiy (418 dollar) shaharlarida, nisbatan pastroq narxlar esa Nukus (277 dollar), Qarshi (289 dollar) va Guliston (289 dollar) shaharlarida qayd etilgan.
Shuningdek, Toshkent shahri va viloyatlar markazlari kesimidagi o‘rtacha uy-joy narxlari asosida ikkilamchi bozorda uy-joy xarid qilish uchun ipoteka krediti olishga (subsidiyasiz) layoqatli aholi ulushi hisoblab chiqilgan. Uy-joy xarid qilishda ipoteka krediti olishga layoqatli aholi ulushini hisoblashda 62 kvadrat metr maydonli uyni xarid qilishda oila daromadining ipoteka kreditiga yo‘naltiradigan qismi 50 foizgacha, kredit muddati 20 yil va boshlang‘ich to‘lov badali 30 foiz deb hisoblangan.
Samarqandda (13 foiz), Namangan (19 foiz) viloyatlari va Toshkent (15 foiz) shahrida uy-joy narxlarining balandligi tufayli ipoteka asosida uy-joy sotib olishga imkoniyati bor xonadonlar ulushi past. Joriy narxlarni hisobga olganda Farg‘ona (35 foiz), Qoraqalpog‘iston (33 foiz) va Navoiyda (32,9 foiz) ipoteka shartlari asosida uy-joy xarid qilish imkoniyati boshqa hududlarga nisbatan yuqori.
Hisob-kitoblarga ko‘ra, respublika bo‘yicha ipoteka krediti asosida uy-joy xarid qilishga layoqatli aholi ulushi 26 foizni tashkil etmoqda.
Umuman olganda, 2021-yil yanvar—noyabr oylarida jismoniy shaxslarga ajratilgan ipoteka kreditlari hajmi 8 trillion so‘mni tashkil etgan. Bunda, yangi tartib asosida ipoteka kreditlari orqali aholini uy-joy bilan ta’minlashga Moliya vazirligi tomonidan ajratilgan resurslar hajmi 3 barobarga oshib, 3,9 trillion so‘mga yetgan (2020-yilda 1,3 trillion so‘m edi).
Avvalroq O‘zbekistonda 2021-yilning uchinchi choragida ikkilamchi ko‘chmas mulk bozoridagi narxlar o‘tgan chorakka nisbatan 2,3 foizga oshgani haqida xabar berilgan edi.
Izoh (0)