Koronavirusning yangi “omikron” shtammi dunyoning 106 ta davlatida aniqlandi. Bu haqda Jahon sog‘liqni saqlash tashkilotining (JSST) haftalik hisobotida ma’lum qilindi, deb xabar beradi “Interfaks”.
“Omikron”ning tarqalishi bo‘yicha ma’lumotlar 21-dekabr kuni Toshkent vaqti bilan soat 18:00 holatiga tegishli.
Shuningdek, JSST “omikron” kollektiv immunitet darajasi yuqori bo‘lgan davlatlarda ham delta shtammidan tezroq tarqalayotganini ma’lum qilgan.
Tashkilotning ta’kidlashicha, virusning ushbu varianti oqibatida yuzaga kelgan kasallikning og‘irlik darajasi to‘g‘risidagi ma’lumotlar oldingidek “cheklangan”, biroq shu bilan birga, hisobotda ko‘rsatilishicha, JAR va Buyuk Britaniyada “omikron” bilan shifoxonaga yotqizilayotgan bemorlar soni “o‘sishda davom etmoqda”.
Bundan tashqari, dastlabki ma’lumotlarga ko‘ra, oldinroq COVID-19 dan tuzalgan yoki vaksinatsiyaning birinchi kursidan o‘tgan bemorlar “omikron”ni koronavirusning oldingi shtammlariga nisbatan yomonroq yengmoqda.
Yuqorida keltirilgan ma’lumotlar asosida JSST “omikron” bilan bog‘liq xatar hamon “juda yuqori”ligi borasida xulosaga kelgan, shuningdek, tashkilot sog‘liqni saqlash tizimlarining qulash xavfidan ogohlantirmoqda.
Avvalroq Boris Jonson Britaniyada “omikron” shtammi bilan kasallangan bemor vafot etganini ma’lum qilgandi. Shuningdek, AQShda ham “omikron” bilan bog‘liq birinchi o‘lim holati qayd etilgan.
Mavzuga doir: JSST: Buster vaksinatsiya dasturi birinchi navbatda immuniteti kuchsiz insonlarga qaratilishi kerak
Izoh (0)