Madagaskarning shimoli-sharqiy qirg‘oqlari yaqinida kema cho‘kib ketdi. Oqibatda kamida 17 kishi halok bo‘ldi, 60 dan ortiq kishi bedarak yo‘qoldi. Bu haqda 21-dekabr kuni “Korrespondent.net” xabar berdi.

“Bortida 130 ga yaqin yo‘lovchisi bo‘lgan kema 20-dekabr kuni ertalab Antanambadan chiqib, Soanyerana Ivongo tomon yo‘l olgandi. Yo‘lda dvigatel xonasiga suv oqib kira boshlagan, shundan so‘ng kema cho‘kib ketgan”, — deyiladi xabarda.

Qutqaruvchilar qidiruv ishlari davomida 17 kishining jasadini topdi. 40 dan ortiq odam qutqarilgan, 60 dan ortiq kishi bedarak yo‘qolgan.

Madagaskar davlat port ma’muriyati ma’lumotlariga ko‘ra, cho‘kib ketgan yuk kemasida yo‘lovchi tashish uchun litsenziya bo‘lmagan.

24-noyabr kuni Fransiya qirg‘oqlari yaqinida ichida bir necha o‘nlab muhojirlar bo‘lgan puflama qayiq cho‘kib ketgandi. Fransiyadan Buyuk Britaniyaga yo‘l olgan muhojirlar ushbu qayiq yordamida La-Mansh bo‘g‘ozidan o‘tishga uringan. Halokatga uchraganlarning ayrimlari Fransiya sohil xizmatlari tomonidan qutqarilgan bo‘lsa-da, ulardan 27 nafari halok bo‘lgan.

Avvalroq qayiq bilan Yevropaga yo‘l olgan 75 dan ortiq muhojir O‘rta Yer dengizining Liviya sohillari yaqinida cho‘kib ketgani haqida xabar berilgandi.