Belarusda Nexta muxolifatchi Telegram kanalining sobiq bosh muharriri Roman Protasevich bilan hibsga olingan rossiyalik Sofya Sapega Belarus prezidentidan afv so‘radi. Bu haqda Sapeganing o‘gay otasi Sergey Dudich “Exo Moskvi” radiostansiyasiga ma’lum qildi.
“Har qanday qaror suddan keyingina qabul qilinishi mumkin. Lekin baribir prezidentning afv etishidan umidvormiz. Sofyaning Belarus Respublikasi prezidenti nomiga afv etishni so‘rab ariza yozganidan xabarim bor. Buyog‘iga nima bo‘lishini kutaylikchi”, — dedi Dudich.
U Sapega hibsga olinganidan keyin qarindoshlari Rossiya Federatsiyasi prezidenti ma’muriyatiga murojaat qilganini eslatdi. “Tashqi ishlar vazirligidan bizning ishimiz va Sofyaning taqdiri nazorat ostida ekani, rossiyalik diplomatlar vaziyat va tergov jarayonini kuzatib borayotgani haqida javob oldik. Qo‘limizdan kelganini qilyapmiz, hamma eshiklarni taqillatib chiqdik”, — dedi Sapeganing o‘gay otasi.
Rossiya prezidenti matbuot kotibi Dmitriy Peskov 21-dekabr kuni jurnalistlarning Belarusda hibsga olingan rossiyaliklar haqidagi savoliga javob berar ekan, shunday dedi: “Fuqarolarimiz manfaatlarini himoya qilish uchun barcha imkoniyatlar ishga solinmoqda”. Uning qo‘shimcha qilishicha, Rossiya va Belarus hukumatlari bu masala bo‘yicha “doimiy muloqotda”.
Eslatib o‘tamiz, 23-may kuni Belarus hukumati Ryanair aviakompaniyasining Afinadan Vilnyusga uchayotgan samolyotini shoshilinch ravishda Minskka qo‘nishga majbur qilgandi. Samolyot yo‘lovchilari orasida Roman Protasevich va uning sevgilisi Sofya Sapega ham bor edi. Ular aeroportda qo‘lga olingan.
Belarus hukumati Roman Protasevichga mamlakat Jinoyat kodeksining uchta moddasi bo‘yicha: 130 (ijtimoiy adovat va kelishmovchilikni qo‘zg‘atish), 293 (ommaviy tartibsizliklarni uyushtirish) va 342 (jamoat tartibini qo‘pol ravishda buzadigan harakatlarni uyushtirish) bilan ayblamoqda.
Dekabr oyida Belarus Tergov qo‘mitasi rossiyalik Sofya Sapegaga nisbatan ijtimoiy nafrat va nifoqni qo‘zg‘atish moddasi bo‘yicha yakuniy ayblov e’lon qildi. BBC rus xizmatining yozishicha, Sapega olti yillik qamoq jazosiga mahkum etilishi mumkin — bu tergov bilan sud oldi kelishuvini hisobga olgan holda mazkur modda bo‘yicha eng kam muddat. Dudichning aytishicha Sapega “tergov bilan kelishuv, Rossiyaning yordam berishi va ekstraditsiyaga, ish umuman sudgacha bormasligiga umid qilayotgandi”.
Izoh (0)