Tailand avval sayohat qilsa bo‘ladigan ayrim provinsiyalarini xorijlik sayyohlar uchun vaqtincha yopib qo‘ydi, faqat Pxuket bundan mustasno. Shu bilan birga, Tailand hukumati tashrif buyuruvchilarning barchasiga qaytadan majburiy karantin joriy etilishini istisno qilmayapti, deb yozadi “Interfaks”.
“Tailand qirolligi Tashqi ishlar vazirligi mamlakatga kirishning Test & Go va Sandbox sxemalari bo‘yicha (Phuket Sandbox’dan tashqari) Thailand Pass’ni olish uchun ro‘yxatdan o‘tish vaqtinchalik yopilganini e’lon qildi. Dasturning to‘xtatilishi va mamlakatga kelganlarning barchasi uchun majburiy karantin qayta tiklanishi ehtimoli haqida mamlakat sog‘liqni saqlash vaziri Anutin Charnvirakul markaziy televideniyedagi chiqishida ma’lum qildi” — dedi Tez Tour turoperatorining Osiyodagi bosh vakili Andrey Snetkov “Interfaks”ga.
Uning tushuntirishicha, Test & Go sxemasi 63 ta davlatning koronavirusga qarshi emlangan aholisi uchun PZR-testining manfiy natijasi bilan Tailandga kirishga ruxsat berardi. Biroq Pxuket provinsiyasida Sandbox sxemasi ishlashda davom etmoqda, dedi Snetkov.
“Hozircha barcha sayohatchilar uchun yangidan majburiy karantin joriy etilishi haqida rasmiy tasdiq yo‘q”, — deya ta’kidladi ekspert.
Avvalroq Tailand hukumati mamlakat ichida koronavirusning “omikron” shtammi bilan kasallangan birinchi bemor haqida xabar bergandi. Bu vaqatga qadar ushbu shtamm mamlakatga chet eldan kelganlarda aniqlangan.
Niderlandiya hukumati “omikron” shtammi tarqalishi tufayli Yevropa Ittifoqi mamlakatlari orasida birinchi bo‘lib lokdaun joriy qilgandi. Shuningdek, Germaniya “omikron” shtammi tufayli britaniyaliklarning mamlakatga kirishini cheklagan.
Eslatib o‘tamiz, Isroil “omikron” shtammining tarqalishini oldini olish maqsadida dunyoda birinch bo‘lib chet el fuqarolari uchun 2 haftaga o‘z chegaralarini yopib qo‘ygandi.
Izoh (0)