“Zavod, fabrika qurib, so‘z san’atidan uzoqroq bo‘libman. Hokim bo‘lish xayolimga ham kelmagan edi” – Jahongir Ortiqxo‘jayev

“Toshkent yoshlar forumi – 2021” tantanali yopilish marosimida poytaxt hokimi Jahongir Ortiqxo‘jayev yoshlarga murojaat qildi. Bu haqda “Daryo” muxbiri xabar qildi.

“Zavod, fabrika qurib, so‘z san’atidan uzoqroq bo‘libman. Hokim bo‘lish xayolimga ham kelmagan edi, shuning uchun gapga unchalik usta emasman”, – deya so‘zini boshladi Jahongir Ortiqxo‘jayev hamda forumning ko‘lami va ahamiyatiga to‘xtalib, unda qo‘shni mamlakatlardan ham yoshlar ishtirok etganini ta’kidladi. Xususan, Qozog‘istondan 31ta yoshlar yetakchisi tashrif buyurgan. Bundan tashqari poytaxt hokimi keyingi yildan Ozarbayjon, Qirg‘iziston, Turkmaniston yoshlari ham forumda ishtirok etishini ma’lum qildi va bu xalqaro forumga aylanishidan umidvorligini aytdi.

“Bugun taqdimotda namoyish etilgan barcha ishlar amalga oshiriladi. Yoshlarga berilgan har bir so‘z nuqta, verguligacha bajariladi. Prezidentimiz bajarilmay qolishiga yo‘l qo‘ymaydi”, – dedi hokim.

Shuningdek, yoshlar forumini tashkil etishda ko‘maklashgan Prezident administratsiyasi, Yoshlar ittifoqi hamda xorijiy davlatlar elchilariga o‘z minnatdorligini bildirdi.

“O‘ziga ishongan insongina vatan kelajagiga ishonib yashaydi. Ijtimoiy tarmoqlarda har narsadan nolib, norozilik bildiradigan odamlar o‘ziga ham ishonmaydi. Biz bu forum orqali yoshlarda o‘ziga va vataniga ishonch uyg‘otishga harakat qildik. Agar va’da berilgan ishlarning qaysidir qismini bajara olmagan bo‘lsak, barchaning ko‘z o‘ngida yoshlardan kechirim so‘rayman. Kelajakda sizning ko‘magingiz bilan Toshkentni gullatib-yashnatamiz”, – deya o‘z so‘ziga yakun yasadi Jahongir Ortiqxo‘jayev.