Toshkent shahridagi “Gazeta korpusi” nomi bilan tanilgan Matbuot uyining ma’muriy binosi sotilmaydigan bo‘ldi. Bu haqda O‘zA direktori o‘rinbosari Xushnudbek Xudoyberdiyev O‘zbekiston prezidentining matbuot kotibi Sherzod Asadovga tayanib ma’lum qildi.
21-dekabr kuni prezident matbuot kotibi Sherzod Asadov bir guruh bosma matbuot nashrlari bosh muharrirlari bilan uchrashgan. Unda bosma matbuot — gazeta va jurnallar faoliyatiga oid muammolar, yangi takliflar muhokama qilingan.
Sherzod Asadovning ma’lum qilishicha Matbuot uyi binosi uzil-kesil sotuvdan olingan. Bino kelgusida ommaviy axborot vositalari, jumladan, bosma nashrlarga qoldiriladi. “Gazeta.uz”ning yozishicha, bino hozirda Axborot va ommaviy kommunikatsiyalar agentligi binosida joylashgan Jurnalistlar uyushmasiga berilishi mumkin.
Shu bilan birga, nashrning manbalariga ko‘ra, O‘zAni Matbuot uyiga ko‘chirib o‘tkazish varianti ham ko‘rib chiqilmoqda, bunda bino uning balansiga o‘tkaziladi. Bu kabi holatda O‘zAning binosi Davlat aktivlarini boshqarish agentligiga o‘tadi. Biroq hozircha bu borada tegishli qaror qabul qilinmagan.
Sherzod Asadovning so‘zlariga ko‘ra, ushbu masala prezident tomonidan nazoratga olingan va bino zamonaviy talablar asosida qayta quriladi hamda ommaviy axborot vositalari, shuningdek, Jurnalistlar uyushmasi foydalanishi uchun topshiriladi.
Bundan tashqari, uchrashuvda OAVlar, bosma nashrlar hamda Jurnalistlar uyushmasi faoliyatini qo‘llab-quvvatlash bo‘yicha maxsus qaror loyihalari tayyorlanayotgani ma’lum qilingan.
Ma’lumot uchun, Matbuot uyining umumiy maydoni 0,82 gektar bo‘lib, bino-inshoot qismi 18 142 metr kvadratni tashkil etadi. Mazkur obyekt 2018-yilning aprel oyida ham sotuvga qo‘yilgan edi. O‘shanda Toshkent shahriga yangi tayinlangan Jahongir Ortiqxo‘jayev binoning auksion savdosida sotilishini to‘xtatgan edi.
Keyinchalik 2019-yil noyabrida Toshkent shahri markazida joylashgan Matbuot uyi binosi 18,75 milliard so‘m narx bilan ikkinchi marta auksionga qo‘yilgan. Ammo bu ma’lumot ochiq auksion saytidan olib tashlangan. 2021-yilning noyabr oxirlarida Davlat aktivlarini boshqarish agentligi Matbuot uyining davlat aktivlari bo‘yicha ommaviy savdo jarayonlari boshlanganini e’lon qilgandi.
Izoh (0)