“Qonun bilan hamma vakolatlar belgilab berildi, javobgarlik kuchaytirildi. Lekin amalda qani?”. Prezident Bosh prokuratura mas’ullarining yer sohasidagi faoliyatidan norozi ekanini bildirdi

Shavkat Mirziyoyev 21-dekabr kuni yer hisobi va davlat kadastrlarini to‘liq shakllantirish, sohaga raqamli texnologiyalarni joriy etish masalalari yuzasidan kengaytirilgan yig‘ilish o‘tkazildi. Bu haqda prezident matbuot kotibi Sherzod Asadov xabar qildi.

Qayd etilishicha, kadastr sohasi mutasaddilariga ishni quyidagi yo‘nalishlarda tashkil etish topshirig‘i berilgan:

• kelgusi yil 1-aprelga qadar qishloq xo‘jaligi yerlarini hisobga olish ishlarini yakuniga yetkazish;
• yer balansidagi farq bo‘yicha yer maydonlarining egasi va aniq toifasini belgilab berish;
• 38 mingta subyektga tegishli yer ajratish hujjatlari to‘liq bo‘lmagan 1 million gektar maydonning ijara shartnomalarini rasmiylashtirish;
• yer ajratish to‘g‘risidagi barcha qarorlarni xatlovdan o‘tkazib, ularning egasi, manzili va chegarasini aniq belgilab, kadastr idoralariga berish;
• dehqon xo‘jaliklarini kadastr ro‘yxatidan o‘tkazish ishlariga 20 milliard so‘m ajratish.

Shu bois viloyat hokimlariga bir oy muddatda kelgusi yilda aholiga ijaraga beriladigan 80 ming gektar yerni, eng avvalo, zaxiraga qaytargan holda davlat ro‘yxatidan o‘tkazib, lotlarga bo‘lib, tanlovga chiqarish topshirig‘i berilgan.

Davlat rahbari yer sohasida qonun ustuvorligini ta’minlash bo‘yicha Bosh prokuratura tegishli mas’ullarining faoliyatidan mutlaqo norozi ekanini ta’kidlagan: “Qonun bilan hamma vakolatlar belgilab berildi, javobgarlik bir necha karra kuchaytirildi. Lekin amalda qani?”.

Yig‘ilish davomida, shuningdek, 23 million gektar qishloq yerlarining elektron xaritasi yaratilgani haqida xabar qilingandi.