Шимолий Корея ҳукумати мамлакат аҳолисига КХДРнинг собиқ етакчиси Ким Чен Ирнинг вафотига 10 йил тўлиши муносабати билан эълон қилинган 11 кунлик мотамда кулиш, туғилган кунларни нишонлаш, яқинларини дафн этиш ва овоз чиқариб йиғлаш тақиқланди, деб хабар беради «Korrespondent.net».
Таъкидланишича, мотам даврида маҳаллий аҳоли бўш вақтларини ўтказа олмайди, харид қилиш ва спиртли ичимликлар ичиши мумкин эмас.
Олдинги йиллардаги мотам кунларида спиртли ичимлик ичган фуқаролар ҳибсга олинган эди. Маҳаллий аҳолининг сўзларига кўра, бу каби инсонлар мафкурафий жиноятчи ҳисобланган, улар олиб кетилган ва бошқа ҳеч ким уларни кўрмаган. Партия раҳбарияти ихтисослаштирилган полиция бригадаларини ташкил этган.
«Агарда оила аъзонгиз мотам вақтида вафот этса, баланд овоз чиқариб йиғлашга рухсат берилмайди, жасадни эса мотам тугаганидан сўнг олиб чиқиш керак бўлади. Одамларнинг туғилган куни мотамга тўғри келиб қолса, байрамни нишонлай ҳам олмайди», — дейди маҳаллий аҳоли.
Маълумот учун, Ким Чен Ир отаси Ким Ир Сен 1994 йилда вафот этганидан сўнг, Шимолий Корея раҳбарига айланган ва мамлакатни ўлимига қадар — 2011 йилгача бошқарган.
Ким Чен Ир даврида Шимолий Кореяда унинг шахсини улуғлаш ва илоҳийлаштириш сиёсати олиб борилган. Ким Чен Ир даврида КХДР вақти-вақти билан оммавий қатл қилиш, қуллик, мажбурий аборт қилиш, Япония ва Жанубий Корея фуқароларини ўғирлаш ва меҳнат концлагерларини барпо этиш каби инсон ҳуқуқларини бузишда айбланган.
Ким Чен Ирнинг ўлимидан сўнг ҳокимият унинг меросхўри — ўғли Ким Чен Инга ўтган.
Аввалроқ КХДР асосчиси Ким Ир Сеннинг укаси вафот этгани тўғрисида хабар берилганди.
Изоҳ (0)