Rasman: Serxio Aguero yuragidagi muammo sabab futbolchilik faoliyatini yakunlaganini e’lon qildi

“Barselona” klubi va Argentina terma jamoasi hujumchisi Serxio Aguero yuragidagi muammolari sabab futbolchilik faoliyatini yakunlaganini ma’lum qildi.

U bu qarorini “Kamp Nou”da tashkil etilgan matbuot anjumanida e’lon qildi. U bu jarayonda ko‘z yoshlarini tiya olmadi.

Ushbu matbuot anjumani futbolchilik faoliyatimni yakunlashga qaror qilganimni aytish uchun.

Bu juda qiyin vaqt, lekin men qabul qilgan qarordan mamnunman. Bu men bir oy oldin duch kelgan muammoga bog‘liq. Bu mening sog‘lig‘im haqida.

Serxio Aguero, sobiq futbolchi

Kun Aguero faoliyatini Argentinaning “Independyente” jamoasida boshlagan. 2003-yildan 2006-yilga qadar ushbu jamoada to‘p surgan hujumchi 56 ta o‘yinda 23 ta gol urishga muvaffaq bo‘lgan. Bu esa Yevropaning yetakchi jamoalari qiziqishiga sababchi bo‘lgandi.

2006-yilda Ispaniyaning “Atletiko” jamoasi Agueroni  xarid qiladi. Kun “matraschilar” safida 234 o‘yinda 101 ta gol urgan.

2011-yilda argentinalik hujumchi “Manchester Siti” safiga borib qo‘shiladi. Ingliz jamoasi safida 390 o‘yinda 260 ta gol urib, “shaharliklar” tarixidagi eng yaxshi to‘purarga aylandi.

“Manchester Siti” bilan shartnomasi yakuniga yetgan Aguero 2021-yilda “Barselona”ga o‘tadi. Serxio “ko‘k-anorranglilar” safida 3 ta o‘yinda ishtirok etib, 1 ta golni o‘z hisobiga yozdirib qo‘ydi.

Serxio Aguero Argentina terma jamoasi safida 101 ta o‘yinda ishtirok etib, 42 marta raqiblar darvozasini ishg‘ol qilgan. Terma jamoa bilan birga 2008-yilda Pekin Olimpiadasi oltin medalini qo‘lga kiritgan, 2021-yilda esa Amerika Kubogi g‘olibiga aylangan.