Dunyo va o‘zbek sportiga oid 14-dekabrning eng muhim xabarlari dayjesti bilan tanishing.
O‘zbekiston
O‘zbekiston futzal terma jamoasi Qozog‘istonga yutqazib qo‘ydiFutzal bo‘yicha O‘zbekiston milliy terma jamoasi 14-dekabr kuni Qozog‘iston terma jamoasi bilan o‘rtoqlik o‘yini o‘tkazdi. Unda o‘zbekistonlik futzalchilar 3:1 hisobida imkoniyatni boy berib qo‘ydi.
O‘rtoqlik o‘yini
Qozog‘iston — O‘zbekiston 3:1
Gollar: 1:0 – 22 Arnold Knaub, 2:0 – 23 Duglas Junior, 2:1 – 37 Ilhom Hamroyev, 3:1 – 39 Igita.Mazkur terma jamoalar o‘rtasidagi ikkinchi o‘rtoqlik o‘yini 15-dekabr kuni bo‘lib o‘tadi.
Parij—2024 Olimpiadasi ochilish marosimi ochiq osmon ostida bo‘lib o‘tadi
2024-yilda Fransiyaning Parij shahrida bo‘lib o‘tadigan yozgi Olimpiya o‘yinlarining ochilish marosimi Sena daryosi bo‘yida o‘tkaziladi. Bu haqda MOQ xabar qilmoqda.
Rejaga ko‘ra, marosimda ishtirokchi davlatlar maxsus qayiqlarda daryo bo‘ylab belgilangan 6 kilometrlik masofani suzib o‘tadi. Parad yo‘nalishi daryo bo‘ylab shaharning ko‘zga ko‘ringan obyektlari oldidan o‘tadi. Hisob-kitoblarga ko‘ra, bunday marosimni 600 ming tomoshabin bevosita sohil bo‘ylarida kuzatib borishi mumkin. Ushbu loyiha amalga oshsa, Olimpiya o‘yinlari tarixida daryo bo‘ylab o‘tgan dastlabki ochilish marosimi bo‘ladi.
La Liga 5 yillik translyatsiya huquqini 4,95 mlrd yevroga sotdi
Movistar va DAZN platformalari La Liga 2022/23—2026/27-yilgi mavsumlari translyatsiya huquqini sotib oldi. Kelishuv 4 milliard 950 million yevroga baholangan.
Ikki platforma o‘yinlarni uzatish huquqini teng bo‘lishadi: har biri bitta turda beshtadan o‘yinni namoyish qiladi.
Chempionlar Ligasi 1/8 final o‘yinlari taqvimi e’lon qilindi
15-fevral va 9-mart
- “Sporting” (Portugaliya) — “Manchester Siti” (Angliya);
- “PSJ” (Fransiya) — “Real” (Ispaniya);
- “Zalsburg” (Avstriya) — “Bavariya” (Germaniya);
- “Inter” (Italiya) — “Liverpul” (Angliya);
- “Chelsi” (Angliya) — “Lill” (Fransiya);
- “Vilyarreal” (Ispaniya) — “Yuventus” (Italiya);
- “Benfika” (Portugaliya) — “Ayaks” (Niderlandiya);
- “Atletiko” (Ispaniya) — “Manchester Yunayted” (Angliya).
UFC sobiq chempioni va Eagle FC promousheni xo‘jayini Habib Nurmagomedov futbol agentligini ochdi.
“Biz futbol sohasida ham rivojlanamiz. Klarens Zeyedorf bilan birga Rossiyada futbol maktabi ochishni rejalashtiryapmiz. Eagles sports management futbol klublariga konsalting xizmatlar ko‘rsatadi.
Bizda hali ish ketmoqda, yoshlarni bolalikdan futbolga tayyorlaymiz. 15–16 yoshingdayoq kuchli jamoada o‘ynamasang, hech narsa chiqmaydi. Ularga to‘g‘ri yo‘l ko‘rsatamiz, boshqa ligalarga yuboramiz: BAA, Saudiya Arabistoni, shuningdek, Yevropa milliy ligalariga”, — deydi Habib.
APL mavsumni to‘xtatishi mumkin
Sky Sports ma’lumotlariga ko‘ra, bir hafta ichida Premyer Ligada koronavirus bilan bog‘liq 42 ta holat qayd etildi. Bu liganing antirekordi hisoblanadi. 6—12-dekabr kunlari 3805 ta test namunalari olingan. O‘tgan haftada 12 kishi virus aniqlangandi.
Daily Mail’ning qo‘shimcha qilishicha, Angliyada joriy mavsumni to‘xtatish muhokama qilinmoqda. “Tottenhem”, “Manchester Yunayted” va “Aston Villa” jamoalarida koronavirus o‘chog‘i aniqlangan.
Avvalroq APL 17-turi doirasidagi “Brentford” — “Manchester Yunayted” uchrashuvi mankunianlar jamoasidagi kasallanishlar sabab qoldirilgan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)