Boks, og‘ir atletika va zamonaviy beshkurash musobaqalari Olimpiya o‘yinlari dasturidan chiqariladi.
Qayd etilishicha, mazkur uch sport turi Xalqaro Olimpiya qo‘mitasi (XOQ) ijroqo‘mi tomonidan 2028-yilgi Olimpiya o‘yinlari dasturining dastlabki ro‘yxatiga kiritilmagan.
Biroq bu boks, og‘ir atletika va beshkurashning olimpiya o‘yinlari tizimidan to‘laligicha chiqarilganini anglatmaydi. Ularda hali o‘z o‘rnini saqlab qolish uchun imkoniyat bor, buning uchun federatsiyalar islohotlar o‘tkazishi va kamchiliklarni bartaraf etishi lozim.
Xususan, AIBA (endilikda IBA) moliyaviy shaffoflikni ta’minlashi va hakamlarni tayinlash jarayonini o‘zgartirishi kerak. IWF’dan (og‘ir atletika federatsiyasi) esa mustaqil antidoping dasturini taqdim etishi talab etiladi. Shuningdek, besh kurash musobaqalariga ham yangi o‘zgartirishlar kiritilishi kutilmoqda.
Mazkur sport turlarining Olimpiya o‘yinlari dasturiga qaytarilishi 2023-yilda XOQ tomonidan qayta ko‘rib chiqiladi.
Ushbu xabarlardan keyin Xalqaro boks federatsiyasining navbatdan tashqari kongressi bo‘lib o‘tdi va unda tashkilot nizomidagi boshqaruv islohotiga qaratilgan o‘zgartirishlar bir ovozdan qabul qilindi. Tashkilot nomi ham rasman AIBA’dan IBA’ga o‘zgartirildi, deb yozmoqda Allboxing.
Bundan buyon IBA kongresslari har yili o‘tkaziladi. IBA direktorlar kengashi a’zolari soni 18 nafargacha qisqartiriladi, nomzodlarni tanlash mezonlari kuchaytiriladi va tekshirish jarayoni yanada samarali bo‘ladi.
Xalqaro olimpiya qo‘mitasi mustaqil ekspertlarning IBA faoliyatiga doir hisobotlari va tavsiyalarini ijobiy baholadi. Va federatsiyaga amal qilishi kerak bo‘lgan shartlarni aytib o‘tdi. Agar shularga amal qilinsa, tashkilot 2023-yilda o‘z o‘rnini qaytarib olishi mumkin.
Biroq hozircha XOQ boksni 2028-yilgi Olimpiada o‘yinlari dasturiga kiritmagan, uning kiritilishi ham IBA’ning ushbu shartlarga amal qilishiga bog‘liq bo‘lib qolmoqda.
Izoh (0)