Amerikaning Suriyadagi maxfiy bo‘linmasi harakatlari oqibatida tinch aholi vakillari qurbon bo‘lgan, deb xabar beradi “Kommersant”. Pentagon va AQSh Davlat departamenti sobiq maslahatchisi Larri Lyuisning ma’lum qilishicha, qurbonlar soni Afg‘onistonda o‘tkazilgan shu kabi operatsiyalarda halok bo‘lganlardan o‘n barobar ortiqroq.
The New York Times’ning (NYT) o‘z manbasiga tayanib yozishicha, maxsus bo‘linma nomi Talon Anvil bo‘lib, u 2014-yildan 2019-yilga qadar faoliyat ko‘rsatgan. Uning tarkibiga kamida 20 kishi kirgan — ular Amerika qurolli kuchlarining zarbalarini muvofiqlashtirgan. Ularning ishtirokida IShIDga qarshi 112 mingga yaqin bomba va raketalar uchirilgan. Talon Anvil zarbalarni avtokolonnalarga, qo‘mondonlik markazlari, minalashtirilgan avtomobillar va terrorchilar otryadlariga yo‘naltirgan.
Ma’lumotlarga ko‘ra, Talon Anvil tinch aholini himoya qilish maqsadida o‘rnatilgan qoidalarga rioya qilmagan. Buning oqibatida fermerlar, bolalar, oilalar va boshqa tinch aholi halok bo‘lgan. Ta’kidlanishicha, buyruqlarni yuqori martabali harbiylar emas, balki Talon Anvil’da xizmat qilgan “nisbatan pastroq lavozimda” bo‘lgan “Delta” maxsus kuchlarining vakillari bergan.
Lyuisning ta’kidlashicha, yildan yilga Talon Anvil faoliyati oqibatida tinch aholi orasidagi qurbonlar soni ortib borgan. U Pentagonning maxfiy ma’lumotlari bilan yaxshi tanishligini bildirgan.
Gazetaning yozishicha, uchuvchilar ba’zida Talon Anvil buyrug‘i asosida zarba berishdan bosh tortgan, chunki bo‘linma aholi zich joylashgan hududlardagi shubhali nishonlarni ko‘rsatgan. Ayrim operatsiyalarda esa Talon Anvil’ning alohida harbiylari ham ishtirok etishni istamagan. NYT’ning ma’lumotlariga ko‘ra, maxsus bo‘linmaning harakatlari Markaziy razvedka boshqarmasi mutaxassislarida qator savollarni yuzaga keltirgan. Boshqarmaning yuqori martabali xodimlari o‘z xavotirlarini rahbariyatga bildirgan. Biroq havo operatsiyalari rahbariyati barcha murojaatlarni befarq qoldirgan.
Noyabr oyida NYT AQShning Suriyada amalga oshirgan bombardimoni oqibatida tinch aholi orasida eng yirik qurbonlarga sabab bo‘lgan surishtiruvini e’lon qilgan. AQSh 80 kishini o‘ldirganini tan olgan. Harbiylarning ta’kidlashicha, ularning 16 nafari IShID a’zosi, to‘rt nafari — tinch aholi bo‘lgan. Ular qolgan qurbonlar terrorchi yoki tinch aholi bo‘lganini bilmagan.
Avvalroq Suriyada “Al-Qoida” yetakchilaridan biri AQSh tomonidan berilgan aviazarba oqibatida halok bo‘lgani to‘g‘risida xabar berilgandi.
Izoh (0)