Шимолий ва Жанубий Корея, АҚШ ва Хитой тинчлик шартномасини тузишга келишиб олди. Бу ҳақда Жанубий Корея президенти Мун Чже Иннинг баёнотига таяниб, BBC хабар берди.
Жанубий Корея раҳбарининг айтишича, Шимолий Корея талаби бўйича АҚШнинг «душманлик сиёсати»ни тўхтатиш тўғрисидаги расмий музокаралар ҳали бошланмаган.
«Шу сабабли биз декларацияни муҳокама қилиш учун бир стол атрофида ўтиролмаймиз. Умид қиламизки, мулоқот бошланади», — деди Чже Ин.
Сентябрь охирида КХДР Жанубий Корея билан уруш тугаганини эълон қилишга ҳали эрта эканини маълум қилганди. Кейинроқ Корея Меҳнат партияси марказий қўмитаси бўлим мудири ўринбосари, Шимолий Корея раҳбарининг синглиси Ким Е Чжон Пхеньян Сеул билан Кореялараро урушнинг расман тугагани тўғрисида конструктив мулоқотга тайёр эканини айтди.
Октябрь бошида Шимолий Корея Жанубий Корея билан алоқаларни тўлиқ тиклашга қарор қилди.
Кореялараро уруш (1950—1953) тинчлик шартномаси билан эмас, балки ўт очишни тўхтатиш ҳақидаги сулҳ имзоланиши билан якунланганидан бери Корея яримороли ҳали ҳам расмий равишда уруш ҳолатида. Сулҳни бир томондан КХДР ва Хитой қўшинлари қўмондонлари, иккинчи томондан эса БМТ байроғи остидаги АҚШ имзолаган. КХДРнинг тинчлик шартномасини имзолашга бўлган кейинги барча уринишлари АҚШ томонидан рад этилди.
АҚШ президенти Дональд Трамп даврида мисли кўрилмаган АҚШ—Шимолий Корея саммити музокаралари бошланди, унинг бошида урушни расман тугатиш бўйича келишувга эришилди. Бироқ, амалда ҳеч қандай сезиларли натижалар кузатилмади.
Изоҳ (0)