AQShda koronavirus oqibatida halok bo‘lganlar soni 800 ming kishiga yetdi. Bu haqda Reuters agentligiga tayanib, “Korrespondent.net” xabar berdi.
Nashrning aniqlik kiritishicha, AQShda infeksiya oqibatida vafot etganlar soni butun Shimoliy Dakota aholisidan oshib ketgan.
Ta’kidlanishicha, mamlakatda 2021-yilda qurbonlar soni 2020-yilga nisbatan ko‘p bo‘lgan: yil boshidan buyon 450 mingdan ortiq odam vafot etgan — bu AQShda pandemiya boshlanganidan buyon jami vafot etganlarning 57 foizi demak.
O‘lim holatlarining bu qadar ortishiga uzoq vaqt davomida AQSh hududida “hukmronlik” qilgan ancha yuqumli hisoblanuvchi “delta” shtammi sabab bo‘lgani aytilmoqda.
“O‘lim holatlarining yuqoriligiga ikkinchi sabab — ko‘plab amerikaliklarning koronavirusga qarshi emlanishdan bosh tortgani. Joriy yilda asosan emlanmagan bemorlar vafot etdi”, — deyiladi xabarda.
Reuters tahlillariga ko‘ra, 111 kunda AQShda o‘lim holatlari soni 600 mingdan 700 mingga yetgan. Keyingi 100 ming o‘lim holati uchun 73 kun kifoya qilgan. Ta’kidlanishicha, AQShda o‘lim holatlari qo‘shni Kanadaga nisbatan uch baravar, Yaponiyaga nisbatan esa 11 barobar ko‘p. Yevropa Ittifoqi bilan taqqoslanadigan bo‘lsa, AQShda so‘nggi 11 oy ichida butun G7 a’zo davlatlarga qaraganda 1,3 baravar ko‘p o‘lim holatlari qayd etilgan.
“Dunyo aholisining 4 foizi yashaydigan mamlakatga COVID-19 asoratlari oqibatida yuzaga kelgan barcha o‘limlarning qariyb 14 foizi to‘g‘ri kelmoqda”, — deya qayd etadi nashr.
Infeksiya oqibatida yuzaga keladigan o‘limlar soni bo‘yicha ikkinchi va uchinchi o‘rinlarda mos ravishda Braziliya va Hindiston bormoqda.
Avvalroq AQShda majburiy emlashga qarshi harakat yetakchisi ancha avval koronavirusga qarshi emlangani ma’lum bo‘lgani, Bill Geyts pandemiyaning kuchsizlanish muddatini prognoz qilgani, amerikalik olimlar koronavirusga qarshi qo‘llaniladigan saqich ishlab chiqqani to‘g‘risida xabar berilgandi.
Izoh (0)