Saudiya Arabistoni COVID-19 ning yangi “omikron” shtammi tarqalishi munosabati bilan Umra ziyorati tartibini o‘zgartirdi. Yangi qoidalarga ko‘ra, chet elliklar ziyoratni amalga oshirishi uchun qirollikda tasdiqlangan ikki komponentli COVID-vaksinalaridan biri bilan emlangan bo‘lishi kerak. Bu haqda Al Jazeera telekanaliga tayanib, Asia Plus xabar berdi.
Jahon sog‘liqni saqlash tashkiloti (JSST) tomonidan tasdiqlangan, ammo qirollikda ro‘yxatdan o‘tmagan vaksinalar bilan emlangan ziyoratchilar uch kunlik karantindan o‘tishi hamda ularning izolyatsiyaga olinganidan 48 soat o‘tgach topshirgan PZR-testi salbiy chiqishi kerak.
Saudiya Arabistoni hukumati qaroriga ko‘ra, chet ellik ziyoratchilarning qirollikda qolish muddati 30 kungacha uzaytirildi. Ilgari xorijliklarga Umra ziyorati vaqtida mamlakatda 10 kun qolishga ruxsat berilardi. Shuningdek, Umra ziyorati 18 yoshga to‘lgan shaxslarga ham ruxsat etilgani xabar qilinmoqda.
Ta’kidlanishicha, xorijlik ziyoratchilar uchun yangi qoidalarning joriy etilishiga mamlakatda birinchi marta “omikron” shtammi bilan kasallanish holati aniqlangani sabab bo‘lmoqda. Saudiya Arabistoni Sog‘liqni saqlash vaziri Fahd al-Jaloil “qirollik dunyodagi vaziyatning qanday tus olishini kuzatishda davom etishini” aytdi va barcha ziyoratchilarni “xavfsizlik choralari va cheklovchi qoidalarga rioya qilishga” chaqirdi.
Meduza nashrining Rossiya to‘g‘ridan to‘g‘ri investitsiyalar fondiga (RTIF) tayanib, xabar berishicha, Saudiya Arabistoni hukumati COVID-19 ga qarshi Rossiyaning “Sputnik V” vaksinasi bilan emlangan odamlarga qirollikka kirishga ruxsat beradi. Xabarga ko‘ra, mazkur qaror 2022-yil 1-yanvardan kuchga kiradi. Bundan tashqari, “Sputnik V” bilan emlanganlar mamlakatga kirish vaqtida 48 soatlik karantindan va PZR-testidan o‘tishi kerak.
“ ‘Sputnik V’ bilan emlangan shaxslarning Saudiya Arabistoniga kirishi dindorlarga Makka va Madina shaharlaridagi islomning muqaddas qadamjolariga (Haj va Umra) ziyorat qilish imkonini beradi”, — deyiladi RTIF xabarida.
Eslatib o‘tamiz, 2021-yilning 10-avgustidan Saudiya Arabistoni hukumati chet elliklarga Umra ziyoratini amalga oshirishga ruxsat bergandi. O‘sha paytda ziyoratchilardan qirollikda tasdiqlangan Pfizer, Moderna, Johnson & Johnson, AstraZeneca vaksinalaridan biri bilan emlangan bo‘lishi yoki manfiy javobli PZR-testni taqdim etishi talab etilgan. Vaksina olmagan ziyoratchilar mamlakatga kelganidan keyin uch kunlik karantindan o‘tib, so‘ng koronavirusga nisbatan qaytadan PZR-test topshirishi kerak edi.
Izoh (0)