Shavkat Mirziyoyev 2-dekabr kuni Birlashgan Arab Amirliklari vitse-prezidenti, bosh vaziri, Dubay amirligi hokimi Muhammad bin Roshid al-Maktum bilan telefon orqali so‘zlashdi. Bu haqda Prezident matbuot xizmati xabar qildi.
Ma’lum qilinishicha, suhbat avvalida O‘zbekiston yetakchisi amirliklar vitse-prezidentini mamlakat tashkil topganining 50 yilligi bilan muborakbod etib, farovonlik, barqaror taraqqiyot va ravnaq tilaklarini bildirgan.
Qayd etilishicha, muloqotda yaqin va do‘stona ikki tomonlama aloqalarni mustahkamlash hamda ko‘p qirrali sheriklikni, eng avvalo, savdo-iqtisodiy va investitsiya sohalarida kengaytirish uchun keng imkoniyatlar mavjud ekani ta’kidlangan.
Shuningdek, yuqori texnologiya va innovatsiyalar, “yashil” energetika, savdo va logistika, shuningdek, intellektual salohiyatni amalga oshirish sohalarida qo‘shma loyihalarni ilgari surishga alohida e’tibor qaratilgan.
“Faol muloqotni davom ettirish va barcha yo‘nalishlarda keng ko‘lamli hamkorlikni davom ettirish yuzasidan kelishuvga erishildi. Telefon orqali muloqot ochiq, do‘stona va ishonchli ruhda o‘tdi”, — deyiladi xabarda.
Prezident 2-dekabr kuni, shuningdek, Abu-Dabi valiahdi, BAA Qurolli kuchlari oliy bosh qo‘mondoni o‘rinbosari Shayx Muhammad bin Zoid al-Nahayon va BAA bosh vaziri o‘rinbosari, Prezident ishlari bo‘yicha vaziri Shayx Mansur bin Zoid al-Nahayon bilan telefon orqali muloqot qilib, milliy bayrami bilan tabriklagandi.
Izoh (0)