O‘zbekistonda avtomototransport vositalariga berilgan ro‘yxatdan o‘tkazish davlat raqami belgisi orqali “avtomobil tarixi”ga oid ma’lumotlarni avtomatik tarzda olish xizmati joriy etilmoqda. Bu haqda Davlat xizmatlari agentligi xabar qildi.
Ma’lum qilinishicha, Normativ-huquqiy hujjatlar loyihalari muhokamasi portalida Davlat xizmatlari agentligi tomonidan ishlab chiqilgan “Avtomobil tarixi” ma’lumotlarini taqdim etish bo‘yicha davlat xizmatini ko‘rsatishning ma’muriy reglamentini tasdiqlash to‘g‘risida”gi hukumat qarori loyihasi e’lon qilingan. Loyihaga ko‘ra, yangi tizim orqali quyidagi ma’lumotlarni olish mumkin bo‘ladi:
- avtotransport vositasining agregat ma’lumotlari, taxminiy yurgan masofasi;
- avtotransport vositasining garovda ekanligi yoki unga nisbatan taqiq mavjud/mavjud emasligi to‘g‘risidagi;
- fuqarolik-huquqiy shartnomalar (ishonchnoma, ijara, hadya, oldi-sotdi shartnomasi, meros va boshqalar) tuzilgani;
- yo‘l-transport hodisasi sodir etilgani;
- avtotransport vositasiga yo‘lovchi tashish bo‘yicha litsenziya varaqasi olingani (olinmagani) haqidagi ma’lumotlar;
- bojxona rasmiylashtiruvidan o‘tgani to‘g‘risidagi va boshqa ma’lumotlar.
Shuningdek, xizmat ixtiyoriy ravishda, muayyan haq evaziga (BHMning 20 foizi) ko‘rsatiladi. Ushbu xizmatdan kelib tushgan mablag‘lar “Avtomobil tarixi” ma’lumotlarini yagona bazaga birlashtirib borish uchun maxsus dastur yaratish, uni yuritib borish, ma’lumotlarni raqamlashtirish va aktual holatda saqlash, texnik xizmat ko‘rsatish kabilarga yo‘naltiriladi.
“Aholiga qulayliklar yaratish maqsadida, xizmat nafaqat Davlat xizmatlari markazi yoki YAIDXP orqali, balki xususiy veb-saytlar, onlayn platformalar orqali ko‘rsatiladi. Ikkilamchi bozorda avtomobil savdosida firibgarlik holatlarining oldini olishda yordam beradi”, deyiladi xabarda.
Mavzuga doir:
Izoh (0)