Шавкат Мирзиёев 2 декабрь куни Бирлашган Араб Амирликлари вице-президенти, бош вазири, Дубай амирлиги ҳокими Муҳаммад бин Рошид ал-Мактум билан телефон орқали сўзлашди. Бу ҳақда Президент матбуот хизмати хабар қилди.
Маълум қилинишича, суҳбат аввалида Ўзбекистон етакчиси амирликлар вице-президентини мамлакат ташкил топганининг 50 йиллиги билан муборакбод этиб, фаровонлик, барқарор тараққиёт ва равнақ тилакларини билдирган.
Қайд этилишича, мулоқотда яқин ва дўстона икки томонлама алоқаларни мустаҳкамлаш ҳамда кўп қиррали шерикликни, энг аввало, савдо-иқтисодий ва инвестиция соҳаларида кенгайтириш учун кенг имкониятлар мавжуд экани таъкидланган.
Шунингдек, юқори технология ва инновациялар, «яшил» энергетика, савдо ва логистика, шунингдек, интеллектуал салоҳиятни амалга ошириш соҳаларида қўшма лойиҳаларни илгари суришга алоҳида эътибор қаратилган.
«Фаол мулоқотни давом эттириш ва барча йўналишларда кенг кўламли ҳамкорликни давом эттириш юзасидан келишувга эришилди. Телефон орқали мулоқот очиқ, дўстона ва ишончли руҳда ўтди», — дейилади хабарда.
Президент 2 декабрь куни, шунингдек, Абу-Даби валиаҳди, БАА Қуролли кучлари олий бош қўмондони ўринбосари Шайх Муҳаммад бин Зоид ал-Наҳаён ва БАА бош вазири ўринбосари, Президент ишлари бўйича вазири Шайх Мансур бин Зоид ал-Наҳаён билан телефон орқали мулоқот қилиб, миллий байрами билан табриклаганди.
Изоҳ (0)