Shavkat Mirziyoyev: “O‘zini yaxshi ko‘rsatgan hokim yordamchilari va respublika vakillariga ipoteka asosida kvartira olishda 50 foizgacha subsidiya ajratiladi”

O‘zini yaxshi ko‘rsatgan hokim yordamchilari va respublika vakillari mukofotlanadi, yil natijalari bo‘yicha esa “Yangi O‘zbekiston islohotchisi” ko‘krak nishoniga tavsiya qilinadi. Ularga ipoteka asosida kvartira olishda 50 foizgacha subsidiya ajratiladi. Bu haqda prezident Shavkat Mirziyoyev raisligida o‘tkazilayotgan ipoteka va qurilish materiallari mavzusidagi videoselektor yig‘ilishida aytib o‘tildi, deya xabar bermoqda “Daryo” muxbiri.

Davlat rahbari hokim yordamchisi faoliyatini tashkil etish bo‘yicha imzolagan farmon asosida hokim yordamchilari 1-yanvardan barcha mahallalarda (9 ming 251 ta) faoliyatini boshlashini qayd etdi. Hokim yordamchilari faoliyatini samarali tashkil etish maqsadida bir yil davomida doimiy faoliyat yuritadigan “Mahallabay ishlash shtabi” tuziladi.

Shuningdek, har bir tuman va shaharga vazirlik, markaziy idoralar va banklardan 1-3 nafardan mas’ul xodim biriktiriladi, bunda mahallalar soni 50 tagacha bo‘lsa – 1 nafar, 100 tagacha – 2 nafar, 100 tadan ortiq bo‘lsa – 3 nafar, jami 342 nafar.

Ular 1 yilga tumanga xizmat safariga yuboriladi va ish joyi, oylik ish haqi saqlab qolinadi. Ushbu vakillar:

• hokim yordamchilarini o‘rgatadi va ular bilan birga, mahallaning TEOsini ishlab chiqadi;
• har kuni bittadan mahallani aylanib, kamida 10 ta xonadonga kiradi, odamlar bilan uchrashib, prezident siyosatini tushuntiradi, mavjud muammolarni joyida hal qiladi;
• tomorqadan samarali foydalanish, aholiga parranda, qo‘y-echki, urug‘ va ko‘chatlar olib berish ishlarini tashkil etadi;
• hal qilinishi lozim bo‘lgan muammolar bo‘yicha tuman va viloyat hokimi, mahalliy kengashlar, vazirliklar oldiga aniq masalalarni qo‘yadi.

“Bosh vazir qabulxonalari va Tadbirkorlikni rivojlantirish agentligi negizida Mahallabay ishlash va tadbirkorlikni rivojlantirish agentligi hamda tuman (shahar)larda Mahallabay ishlash va tadbirkorlikni rivojlantirish markazlari tashkil etiladi”, – dedi prezident.

Ushbu tizimni samarali yo‘lga qo‘yishga barcha hudud va sektor rahbarlari mas’ulligi aytildi.