Shavkat Mirziyoyev 2-dekabr kuni Abu-Dabi valiahdi, Birlashgan Arab Amirliklari Qurolli kuchlari oliy bosh qo‘mondoni o‘rinbosari Shayx Muhammad bin Zoid al-Nahayon va BAA bosh vaziri o‘rinbosari, Prezident ishlari bo‘yicha vaziri Shayx Mansur bin Zoid al-Nahayon bilan telefon orqali muloqot qildi. Bu haqda Prezident matbuot xizmati xabar qildi.
Ma’lum qilinishicha, davlat rahbari amirliklar rahbariyati va xalqini ushbu mamlakat tashkil topganining 50 yilligi bilan samimiy qutlab, tinchlik-osoyishtalik, farovonlik, bardavom taraqqiyot va ravnaq tilagan. Suhbatda ko‘p qirrali O‘zbekiston—BAA hamkorligi kun tartibidagi dolzarb masalalar ko‘rib chiqilgan. Uzoq muddatli sheriklikning yangi ilg‘or yo‘nalish va dasturlarini belgilab olish maqsadida faol muloqot va almashinuvlarni davom ettirish muhim ekani qayd etilgan.
Qayd etilishicha, qo‘shma innovatsion loyihalar va moliyaviy-texnik ko‘mak dasturlarini amalga oshirish masalasiga alohida e’tibor qaratilib, bunda Dubaydagi EXPO butunjahon ko‘rgazmasida ham o‘z ifodasini topgan mamlakatlar salohiyatini hisobga olish lozimligi ta’kidlangan.
“Istiqbolli loyihalarning yangi portfelini shakllantirish uchun yaqin fursatda hukumatlar delegatsiyalarining ikki tomonlama uchrashuvlarini o‘tkazishga kelishib olindi”, — deyiladi xabarda.
Izoh (0)