Maxachqal’adan Navoiy shahriga parvozlar yo‘lga qo‘yiladi

Red Wings aviakompaniyasi Dog‘iston poytaxti Maxachqal’adan O‘zbekistonning Navoiy shahriga parvozlarni amalga oshiradi. Bu haqda “TACC” xabar qildi.

Maxachqal’a aeroporti matbuot xizmatining ma’lum qilishicha, Maxachqal’a—Navoiy—Maxachqal’a yo‘nalishi bo‘yicha to‘rtta reys rejalashtirilgan.

“Navoiyga qatnovlar 25-dekabr va 8-yanvar kunlari amalga oshiriladi. Ortga qaytish esa mos ravishda 26-dekabr va 9-yanvarga belgilangan”, — deyiladi xabarda.

Qayd etilishicha, reyslar 100 nafargacha yo‘lovchini sig‘dira oladigan Sukhoi Superjet 100 samolyotlarida amalga oshiriladi.

Eslatib o‘tamiz, Sankt-Peterburgdan Buxoro va Namanganga muntazam aviaqatnovlar yo‘lga qo‘yilishi xabar qilingandi. 2-dekabr, payshanba kuni Rossiyaning Smartavia aviakompaniyasi Namanganga ilk muntazam parvozini amalga oshirdi.

Shuningdek, Qanot Sharq Toshkentdan Sochiga muntazam parvozlarni yo‘lga qo‘ygani, Rossiyaning Volgograd shahridan O‘zbekistonga muntazam aviaqatnovlar amalga oshirilishi va Namangan xalqaro aeroportidan Novosibirsk va Qozonga aviaparvozlar yo‘lga qo‘yilayotgani xabar qilingan.