Sankt-Peterburgdan Buxoro va Namanganga muntazam aviaqatnovlar yo‘lga qo‘yiladi

Rossiyaning Smartavia aviakompaniyasi O‘zbekistonga birinchi muntazam parvozlarini yo‘lga qo‘ydi. Bu haqda aviakompaniya matbuot xizmatiga tayanib “TASS” xabar berdi.

Ungacha Smartavia faqat charter reyslarini amalga oshirgan. Aviakompaniya ikkita yo‘nalish bo‘yicha xizmat ko‘rsatadi, ulardan birida parvozlar boshlangan.

Sankt-Peterburg—Buxoro—Sankt-Peterburg yo‘nalishi bo‘yicha birinchi reys 24-noyabr kuni amalga oshirilgan. Parvozlar har seshanba kuni Boeing 737-800 samolyotlarida amalga oshiriladi.

Ikkinchi reys Sankt-Peterburg va Namangan o‘rtasida bo‘lib, parvozlar 1-dekabrdan boshlab har chorshanba kuni amalga oshiriladi.

Ushbu yo‘nalishlar bo‘yicha chiptalar narxini aviakompaniya saytidan yoki aviachiptalar sotuvchi agentliklardan bilib olish mumkin.

Smartavia joriy qish mavsumida O‘zbekistonga muntazam parvozlarni amalga oshiradigan Rossiya aviakompaniyalarining avval e’lon qilingan ro‘yxatiga kiritilgan edi. Ro‘yxatda yuqoridagi ikkala reys ham o‘rin olgan.