Prezidentning 29-noyabrdagi farmoni bilan O‘zbekiston jamoat xavfsizligi konsepsiyasi tasdiqlandi, deb xabar bermoqda Adliya vazirligi matbuot xizmati.
Konsepsiyaga ko‘ra, ommaviy tadbirlarni o‘tkazish va istirohat bog‘lari, xiyobonlar va bozorlarda jamoat tartibini saqlash Milliy gvardiya bo‘linmalari tomonidan amalga oshiriladi. Ularga ma’muriy huquqbuzarliklarga oid ishlarni ko‘rib chiqish vakolati ham beriladi.
2022–2023-yillarda tuman ichki ishlar organlari tarkibidagi konvoy bo‘linmalari bosqichma-bosqich viloyat ichki ishlar organlarining bevosita bo‘ysunuviga o‘tkazilib, yagona boshqaruv tizimi asosida tumanlararo xizmat o‘tash tamoyiliga muvofiq qayta tashkil etiladi.
2022-yil 1-martgacha kamida bittadan tumanlararo patrul-post xizmati bo‘linmalari tashkil etiladi. O‘sha yilning 1-mayigacha ichki ishlar organlari konvoy faoliyatiga konvoy ostidagi shaxslarni elektron brasletlar orqali nazorat qilish tizimi joriy etiladi.
2024-yil 1-sentabrdan Toshkent shahar ichki ishlar organlari, 2025-yil 1-sentabrdan qolgan hududiy ichki ishlar organlari profilaktika katta inspektori lavozimlariga faqat oliy yuridik ma’lumotga ega xodimlar tayinlanadi.
Farmon bilan shuningdek, 2022—2025-yillarda O‘zbekistonda jamoat xavfsizligini ta’minlash tizimini rivojlantirish strategiyasi tasdiqlangan. Strategiyaga ko‘ra, jamoat xavfsizligini ta’minlash sohasida, jumladan, quyidagilarni amalga oshirish nazarda tutilgan:
- yo‘l harakati qoidalarini muntazam qasddan buzuvchilarga transportni boshqarish huquqidan uzoq muddatga mahrum qilishga oid jinoiy javobgarlik kiritiladi;
- har 5 ta mahalla uchun bitta mahalla huquq-tartibot maskani namunaviy loyiha asosida tashkil etiladi;
- “Jinoyat o‘choqlari” bo‘lgan hududlarda tungi vaqtda ichki ishlar organlari va Milliy gvardiya bo‘linmalaridan iborat avtopatrul, otliq va piyoda patrullarning uzluksiz faoliyati yo‘lga qo‘yiladi.
Izoh (0)