Ijtimoiy tarmoqlarda Toshkent shahri Mirzo Ulug‘bek tumanida 17 yoshli maktab o‘quvchisi hazil video olish uchun avtomobil yo‘li o‘rtasida cho‘milgani to‘g‘risida xabar berilgandi. Tuman hokimligi matbuot xizmatining ma’lum qilishicha, ushbu fuqaroning ishi Bolalarni himoya qilish masalalari bo‘yicha komissiyada ko‘rib chiqilgan.
Mirzo Ulug‘bek nomidagi Mafifidum maktabining o‘quvchilari 17 yoshli T.S. va O.M. Buyuk ipak yo‘li ko‘chasining avtomobillar harakati qismida hayoti uchun xavfli bo‘lgan (trend) noodatiy harakatlarni amalga oshirgan. Xususan, ijtimoiy tarmoqlarda tarqalgan videoda T.S. o‘zining ustidan bir chelak suv sepib, yugurgani aks etgan.
Ma’lum qilinishicha, tuman hokimligi Bolalarni himoya qilish masalalari bo‘yicha komissiyasida ushbu o‘quvchilar harakatiga qonuniy chora ko‘rilgan. Ma’muriy javobgarlik to‘g‘risidagi kodeksning 47-modda (bolalarni tarbiyalash va ularga ta’lim berish borasidagi majburiyatlarni bajarmaslik) 1-qismiga asosan har bir o‘quvchining ota-onasiga jarima jazosi qo‘llangan.
Mazkur huquqbuzarlik uchun BHMning bir baravaridan besh baravarigacha miqdorda (1,35 million so‘m) jarima solinishi ko‘zda tutilgan.
Avvalroq Toshkentda Spark ustida sherigini bog‘lab, TikTok uchun rolik suratga olgan blogerlar 10 sutkaga qamalgani, Buxoroda TikTok uchun drift qilgan haydovchiga chora ko‘rilib, “Jiguli”si jarima maydoniga joylashtirilgani to‘g‘risida xabar berilgandi.
Izoh (0)