Farg‘ona viloyat sudi jinoyat ishlari bo‘yicha appelyatsiya instansiyasining ochiq sud majlisida 12 marta sudlangan 54 yoshli fuqaroning ishi ko‘rib chiqildi. Bu haqda MY5 telekanalining “Markaziy studiya” dasturida ma’lum qilindi.
Ma’lum qilinishicha, fuqaro M.H. jabrlanuvchi M.ning ishonchiga kirib, undan jami 70 million so‘mlik ayollar kiyimlarini pulini bo‘lib to‘lash yo‘li bilan olib, ushbu kiyimlarni o‘ziga tanish bo‘lgan boshqa fuqarolarga sotgan va pullarni o‘z ehtiyojlari uchun sarflab yuborgan.
Bundan tashqari, M.H. yana bir fuqaroning ishonchiga kirib, unga tegishli bo‘lgan 9,1 million so‘mlik kiyim-kechaklarni pulini bo‘lib to‘lash yo‘li bilan olib, sotuvdan tushgan pullarni ishlatib yuborgan.
Shuningdek, M.H. 2020-yilning may oyida fuqaro G‘.ning ishonchiga kirib, ikki oy muddat ichida qaytarib berish sharti bilan 5 million so‘mli turli tovar moddiy boyliklarini qarzga sotib olib, pullarni qaytarib bermagan.
Farg‘ona viloyat sudi jinoyat ishlari bo‘yicha appelyatsiya instansiyasida 11 marotaba sudlangan ayolning 12-qilmishi qaytadan ko‘rib chiqilgan.
Ta’kidlanishicha, Farg‘ona viloyatining Marg‘ilon shahrida tug‘ilgan fuqaro M.H. oilali, to‘rt nafar farzandning onasi bo‘lib, asosan, Jinoyat kodeksining 168-moddasi (firibgarlik) bo‘yicha sudlangan.
“Yetkazilgan moddiy zararning o‘rni qoplanmagani sababli Jinoyat kodeksining 59-moddasi 8-qismi tartibida tayinlangan 5 yil 1 oyga ozodlikdan mahrum qilish va BHMning 150 baravari miqdoridagi (33,45 million so‘m) jarima o‘zgarishsiz qoldirilgan”, — deyiladi xabarda.
Ushbu fuqaroning ozodlikdan mahrum qilish bilan bog‘liq bo‘lmagan jazo turini tayinlashni so‘ragan appelyatsiya shikoyatlari qanoatlantirilmagan.
Avvalroq Farg‘ona va Buxoroda chet elga viza tayyorlab berishni va’da qilib, fuqarolar pulini firibgarlik yo‘li bilan olgan shaxslar ushlangani, Surxondaryoda 10 tonna sarimsoq piyozni olib, pulini bermay ketgan fuqaroga jinoyat ishi qo‘zg‘atilgani to‘g‘risida xabar berilgandi.
Izoh (0)