Shavkat Mirziyoyev 2022-yilda quriladigan 22 ta “Yangi O‘zbekiston” massivlari aholisi uchun 15 gektardan qishloq xo‘jaligi yerlari ajratish haqida ko‘rsatma berdi

Hududlarda 1 milliondan ortiq aholi uchun “Yangi O‘zbekiston” massivlarini qurish loyihasi “mamlakat farovonligini oshirish, yashash sharoitlarini yaxshilash borasidagi eng muhim islohotlardan biridir”. Bu haqda prezident Shavkat Mirziyoyev 30-noyabr kuni yangi massivlar qurilishiga doir taqdimot bilan tanishi vaqtida aytib o‘tdi, deya xabar bermoqda “O‘zbekiston 24” telekanali.

“Dastur asosida 2022-yilda 22 ta massivda 34 ta maktab quriladi, 43 ta bog‘cha, 21 ta tibbiyot muassasi qurilishi kerak. Bu ham hamma sharoitlarni yaratish uchun loyihaga kirgan. Eng katta maqsadim — massivlarda kichik sanoat zonalari, tadbirkorlik subyektlarini tashkil etish orqali kamida 50 ming ish o‘rni yaratishimiz zarur”, — degan prezident. Ayni vaqtda, Shavkat Mirziyoyev ilk namunaviy massiv Farg‘onaning Bog‘dod tumanida, “imkoni yo‘q joyda” amalga oshirilganini qayd etib o‘tgan.

Prezident ushbu massivlarda kamida 1000 ta xonadon bo‘lishi maqsadga muvofiqligini ta’kidlagan. “O‘zbekiston 24” reportajida Namanganning Chust tumani “Gulzor” mahallasida bunyod etilishi rejalashtirilayotgan massivda uch yilda jami 1180 ta xonadon (2021-yilda 500 ta xonadonli 22 ta, 2022-yilda 300 ta xonadonli 15 ta, 2023-yilda 380 ta xonadonli yana 15 ta ko‘p qavatli uy) foydalanishga topshirilishi rejalashtirilganini ko‘rish mumkin.

Davlat rahbari yangi massivlar aholisi uchun ular yaqinidan 15 gektardan qishloq xo‘jaligi yerlarini ajratish zarurligini aytgan. Shavkat Mirziyoyev ushbu massivlarni qurishda har bir bino va inshootga energiya tejamkor uskunalarni joylashtirish, qurilish materiallarini ishlab chiqarishda mahalliy xomashyolardan keng foydalanish, shu orqali narxlarni arzonlashtirish, aholi uchun zarur barcha qulayliklarni yaratish yuzasidan topshiriq va ko‘rsatmalar bergan.

Qurilish vaziri birinchi o‘rinbosari Davronjon Odilov “O‘zbekiston 24” telekanaliga bergan intervyusida, jumladan, shunday dedi: “Prezident bu loyihalarda asosan e’tibor qaratilishi kerak bo‘lgan nuqtalar qilib, massivlarni tanlashda viloyatlarning eng uzoq, bugungi kunda uy-joyga ehtiyoji baland, e’tibordan chetda qolgan, infratuzilma obyektlari yetib bormagan, kommunikatsiya tarmoqlari bilan to‘la ta’minlanmagan hududlarini tanlab, o‘sha hududlarni obodlantirishga, infratuzilma, taraqqiyot olib kirishga qaratdi”.

Prezident matbuot xizmatining 30-noyabrdagi axborotida “Yangi O‘zbekiston” massivlarini qurish dasturiga bag‘ishlangan noyabr oyi boshidagi videoselektordan so‘ng “yangi massivlar uchun shahar yoki tuman markaziga yaqin, infratuzilmaga ega joylar tanlanib, dastlabki loyihalar shakllantirilgani”, ta’kidlanadi; “O‘zbekiston 24” telekanalining 30-noyabrdagi reportajida massivlarni shahar va tuman markazlariga yaqin, infratuzilmaga ega joylarda qurish ko‘rsatmasi prezident tomonidan berilgani aytilgan.

Qurilish vaziri birinchi o‘rinbosarining qo‘shimcha qilishicha, prezident taqdimot chog‘ida energiya tejamkorlikka alohida qaratishga, “eng kamida umumfoydalanish maydonlaridagi energiya sarfini muqobil energiyadan olish bo‘yicha” topshiriq bergan. Vazir o‘rinbosarining ta’kidlashicha, buning uchun mavjud norma va standartlarga ham tegishli o‘zgartish va qo‘shimchalar kiritiladi. Shuningdek, massivlarning landshaft arxitekturasi “Yashil makon” g‘oyasidan kelib chiqib, qayta ko‘rib chiqiladi.