O‘zbekiston birjasida xorij valyutalari oldi-sotdisi uchun undiriladigan komissiya qariyb ikki baravarga kamaytiriladi

O‘zbekiston valyuta birjasi xorij valyutasi oldi-sotdisi uchun undiriladigan komissiya miqdorini qariyb ikki barobarga kamaytiradi. Bu haqda birja matbuot xizmatiga tayanib, Spot xabar berdi.

Ma’lum qilinishicha, 1-dekabrdan boshlab komissiya miqdori diler sof aylanmasining 0,027 foizini tashkil etadi (xorijiy valyutani sotib olish va sotish hajmlari o‘rtasidagi ijobiy farq). Ilgari 0,05 foiz undirilgan.

Shuningdek, birja qator bitimlardan komissiya undirishni to‘xtatadi. Xususan:

• Rossiya rublini so‘mga almashtirish va aksincha (RUB/UZS), shuningdek, mazkur valyuta juftligi bo‘yicha boshqa operatsiyalar;
• Xitoy yuanini so‘mga almashtirish va aksincha (CNY/UZS);
• banklararo valyuta SVOP operatsiyalari;
• dilerlararo REPO operatsiyalari.

Ushbu qadamlar valyuta birjasini rivojlantirish strategiyasining bir qismi bo‘lgan moslashuvchan tarif siyosatini amalga oshirish rejasida ko‘zda tutilgan. Ularning maqsadi — operatsiyalar hajmini va bozor likvidligini oshirish.

Bundan tashqari, savdo operatsiyalari narxining pasayishi hisobiga valyuta birjasi tijorat banklari valyuta operatsiyalari hajmini oshirishini kutmoqda.

Ma’lumot uchun, dollar kursi noyabr o‘rtalaridan boshlab keskin o‘sishni boshlagan, 30-noyabr kuni esa 10 840 so‘mga chiqib ketgan edi. Bunga qadar Markaziy bank o‘zbek valyutasi 2021-yilning yanvar—oktabr oylarida 2 foizgagina qadrsizlanganini ma’lum qilgandi — bu so‘nggi yillardagi eng past ko‘rsatkich hisoblanadi. Biroq Hisob palatasi 2022-yilda dollar kursi 11 300 so‘mgacha ko‘tarilishini prognoz qilmoqda.