BMT Jahon sayyohlik tashkiloti (UNWTO) ekspertlarining xulosasiga ko‘ra, xalqaro turizm pandemiyadan oldingi ko‘rsatkichga 2023-yildan erta qaytmaydi. Bu haqda tashkilot bosh kotibi Zurab Pololikashviliga tayanib, “RBK” xabar berdi.
“Ekspertlarning qariyb yarmi (45 foiz) xalqaro turizm 2019-yilgi darajaga 2024-yilda yoki undan keyin qaytadi deb hisoblamoqda, 43 foizi esa 2023-yilda qayta tiklanishini ko‘rsatmoqda”, — deydi u.
Pololikashvilining so‘zlariga ko‘ra, ekspertlar 2022-yilning ikkinchi va uchinchi choraklarida xalqaro turizmning “juda pozitiv ko‘tarilish” hajmini kutmoqda. UNWTO bosh kotibining aytishicha, bu sayohatlar uchun kechiktirilgan talab bilan bog‘liq. “Ayni vaqtda Janubiy Yevropa, Markaziy Amerika va Karib havzasi mintaqalarida kichik qayta tiklanishlarni kuzatyapmiz”, — deydi Pololikashvili.
Shuningdek, uning ta’kidlashicha, koronavirusga qarshi vaksinatsiya sertifikatlarining o‘zaro tan olinishi ham “shubhasiz” turizmning qayta tiklanishiga ijobiy ta’sir ko‘rsatadi. “Emlangan sayohatchilar uchun sayohat cheklovlarini yumshatish va turli vaksinalarning tan olinishi iste’molchilarda sayohatga bo‘lgan ishonchni oshirishga yordam beradi”, — deya qo‘shimcha qiladi u.
Eslatib o‘tamiz, 2020-yilning dekabrida xalqaro turizm 2020-yilning dastlabki 10 oyida 70 foizdan ko‘proqqa pasayib, 1990-yil darajasiga tushgani to‘g‘risida xabar berilgandi. O‘shanda UNWTO prognozlariga ko‘ra, 2021-yilning ikkinchi yarmiga kelib turizm qisman tiklanishi mumkinligi, ammo 2019-yilgi xalqaro darajasiga qaytishi katta ehtimol bilan 2,5 yildan 4 yilgacha vaqt ketishi aytilgan edi.
Izoh (0)