AQShning sobiq mudofaa vaziri Mark Esper prezident Donald Tramp administratsiyasida ishlagan davrlariga bag‘ishlangan memuarining bir qismini e’lon qilishga qo‘yilgan taqiq sabab Pentagonni sudga berdi. Bu haqda The New York Times gazetasiga tayanib, “Korrespondent.net” xabar berdi.
Tramp tomonidan ishdan bo‘shatilgan amaldor uning 2020-yilgi prezidentlik saylovlaridagi muvaffaqiyatsizligidan so‘ng, may oyida “Muqaddas qasam” nomli kitobini taqdim etish niyatini ma’lum qilgandi. Esper uni “xalqning to‘liq va bo‘rttirishsiz tarixi, ayniqsa, uning og‘ir davrlarida” deya ta’riflagan.
“Matnning muhim qismi maxfiylik bahonasida nashrdan olib tashlandi. Olib tashlangan matn qo‘lyozmada muhokama qilingan muhim voqealarni bayon etish uchun zarurdir”, — deyiladi da’voda.
Pentagonning sobiq rahbari AQShning amaldagi administratsiyasi so‘z erkinligi bo‘yicha “birinchi tuzatish bilan himoyalangan konstitutsiyaviy huquqlarni” buzishda ayblagan.
Esperning aniqlik kiritishicha, uning memuarlarini tekshirgan mudofaa idorasi amaldorlari “sobiq prezident Trampdan va boshqa uchrashuvlardan iqtibos keltirmaslikni, sobiq prezident va mening o‘rtamdagi subhatlarni izohlamaslikni, shuningdek, tarixiy voqealarni tasvirlashda ayrim fe’l yoki otlardan foydalanmaslikni so‘ragan”.
Esperning so‘zlariga ko‘ra, undan “boshqa mamlakatlarning xatti-harakatlari, chet el rasmiylari bilan o‘tkazgan suhbatlari va keng tarqalgan xalqaro voqealar haqidagi qarashlar”ni o‘chirish so‘ralgan.
Sobiq amaldorning qo‘lyozmada AQSh milliy xavfsizligini tahdid ostiga qo‘yadigan yoki maxfiy biror nima yo‘qligiga ishonchi komil.
Ma’lumot uchun, Mark Esper 2019-yilning iyulidan 2020-yilning noyabriga qadar AQSh mudofaa vaziri lavozimida faoliyat yuritgan. 2020-yilning 3-iyunida Pentagonda o‘tkazilgan brifingda u afroamerikalik Jorj Floydning o‘limi sabab yuzaga kelgan norozilik namoyishlarida xavfsizlikni ta’minlash uchun armiyani jalb etilishini qo‘llab-quvvatlamasligini bildirgan. Ushbu bayonot prezident Trampdan uzoqlashish sifatida qabul qilingan. Shu yilning 9-noyabrida Tramp kutilmaganda Esperning lavozimdan olinganini va uning o‘rniga Kristofer Miller tayinlanganini e’lon qilgan.
Izoh (0)