АҚШнинг собиқ мудофаа вазири Марк Эспер президент Дональд Трамп администрациясида ишлаган даврларига бағишланган мемуарининг бир қисмини эълон қилишга қўйилган тақиқ сабаб Пентагонни судга берди. Бу ҳақда The New York Times газетасига таяниб, «Korrespondent.net» хабар берди.
Трамп томонидан ишдан бўшатилган амалдор унинг 2020 йилги президентлик сайловларидаги муваффақиятсизлигидан сўнг, май ойида «Муқаддас қасам» номли китобини тақдим этиш ниятини маълум қилганди. Эспер уни «халқнинг тўлиқ ва бўрттиришсиз тарихи, айниқса, унинг оғир даврларида» дея таърифлаган.
«Матннинг муҳим қисми махфийлик баҳонасида нашрдан олиб ташланди. Олиб ташланган матн қўлёзмада муҳокама қилинган муҳим воқеаларни баён этиш учун зарурдир», — дейилади даъвода.
Пентагоннинг собиқ раҳбари АҚШнинг амалдаги администрацияси сўз эркинлиги бўйича «биринчи тузатиш билан ҳимояланган конституциявий ҳуқуқларни» бузишда айблаган.
Эспернинг аниқлик киритишича, унинг мемуарларини текширган мудофаа идораси амалдорлари «собиқ президент Трампдан ва бошқа учрашувлардан иқтибос келтирмасликни, собиқ президент ва менинг ўртамдаги субҳатларни изоҳламасликни, шунингдек, тарихий воқеаларни тасвирлашда айрим феъл ёки отлардан фойдаланмасликни сўраган».
Эспернинг сўзларига кўра, ундан «бошқа мамлакатларнинг хатти-ҳаракатлари, чет эл расмийлари билан ўтказган суҳбатлари ва кенг тарқалган халқаро воқеалар ҳақидаги қарашлар»ни ўчириш сўралган.
Собиқ амалдорнинг қўлёзмада АҚШ миллий хавфсизлигини таҳдид остига қўядиган ёки махфий бирор нима йўқлигига ишончи комил.
Маълумот учун, Марк Эспер 2019 йилнинг июлидан 2020 йилнинг ноябрига қадар АҚШ мудофаа вазири лавозимида фаолият юритган. 2020 йилнинг 3 июнида Пентагонда ўтказилган брифингда у афроамерикалик Жорж Флойднинг ўлими сабаб юзага келган норозилик намойишларида хавфсизликни таъминлаш учун армияни жалб этилишини қўллаб-қувватламаслигини билдирган. Ушбу баёнот президент Трампдан узоқлашиш сифатида қабул қилинган. Шу йилнинг 9 ноябрида Трамп кутилмаганда Эспернинг лавозимдан олинганини ва унинг ўрнига Кристофер Миллер тайинланганини эълон қилган.
Изоҳ (0)