“Samarqand hududiy elektr tarmoqlari” korxonasining xodimlari yangi rahbar tomonidan ommaviy ishdan bo‘shatilgani aniqlangan edi. Korxona matbuot xizmati ushbu holatga rasmiy munosabat bildirdi, deb xabar beradi “Daryo” muxbiri.
Korxona axborot xizmatining ma’lum qilishicha, Samarqand viloyat bandlik bosh boshqarmasi davlat mehnat inspeksiyasi tomonidan “Samarqand hududiy elektr tarmoqlari” aksiyadorlik jamiyatida xodimlarni ishdan bo‘shatilishi borasida o‘rganish ishlari olib borilmagan. O‘rganish olib borish to‘g‘risida Samarqand viloyat bandlik bosh boshqarmasi davlat mehnat inspeksiyasi “Samarqand hududiy elektr tarmoqlari” AJga murojaat qilmagan.
Tashkilotning fikricha, e’lon qilingan maqolada ishdan bo‘shatilgan xodimlarning ismi, sharifi va lavozimlari, ularning soni ko‘rsatilmagani kishida go‘yoki “Samarqand hududiy elektr tarmoqlari” AJda faoliyat ko‘rsatuvchi 2375 nafar xodim ishdan bo‘shatilayotgandek taassurot uyg‘otadi.
“Vaholanki, mazkur maqolada so‘z Samarqand shahar elektr ta’minoti korxonasida faoliyat ko‘rsatib kelgan fuqarolar F.Rustamov, O.Fayzullayev, U.Mallayev, O.Turdiyev to‘g‘risida bormoqda”, — deyiladi munosabatda.
Ta’kidlanishicha, mazkur fuqarolar bundan avval ham internet tarmog‘idagi ijtimoiy sahifalarda o‘z e’tirozlarini bayon qilgan va “Samarqand hududiy elektr tarmoqlari” AJ tomonidan rasmiy munosabat bildirilgan. Yuqorida nomlari keltirilgan fuqarolarning barchasi o‘z xizmat vazifalariga sovuqqonlik bilan yondashgani, mehnat intizomini qo‘pol ravishda buzgani sababli egallab turgan vazifalaridan ozod qilingan.
Bundan tashqari, 107 ta xonadonda jami 128 million so‘mlik qarzdorlik aniqlanib, tarmoqdan uzilgan bo‘lsa-da, mazkur xonadonlar elektr energiyasini qayta ulab, foydalanib kelgani aniqlangan. Shuningdek, debitorlik qarzdorligi mavjud bo‘lgan iste’molchilarning qarzdorliklarini asossiz qayta hisob-kitob qilish (qarzdorlikni elektron bazadagi iste’molchining hisobidan o‘chirish) holatlariga yo‘l qo‘ygan.
Masalan, Samarqand shahar Z.Toshpo‘latova ko‘chasida yashovchi fuqaro A.Rahmonovning elektr energiyasidan 6,2 million so‘m qarzdorlik aniqlanib, elektron bazaga kiritilgan bo‘lsa-da, 2021-yilning 25-fevral kuni ushbu mablag‘ asossiz ravishda qayta hisob-kitob qilinib, qarzdorlik bazadan chiqarilgan.
O. Fayzullayev Samarqand shahar elektr ta’minoti korxonasi Temiryo‘l hududi elektr hisoblagichlarni almashtirish elektromontyori vazifasida ishlab kelgan. Faoliyati davomida O.Fayzullayev ham unga yuklatilgan xizmat vazifalariga sovuqqonlik bilan yondashib, qator qonunbuzilish holatlariga yo‘l qo‘ygani aniqlangan.
Jumladan, 2020-yil 12-noyabr kuni Samarqand shahar Abu Bakr Roziy ko‘chasi 26-uy, 51-xonadonda istiqomat qiluvchi fuqaro A.Rahimovga nisbatan elektr energiyasidan foydalanish qoidalarini buzgani uchun dalolatnoma rasmiylashtirilgan bo‘lib, noqonuniy iste’mol qilingan elektr energiyasi uchun 7,9 million so‘m qarzdorlik hisoblangan. O.Fayzullayev tomonidan mazkur qarzdorlik noqonuniy tarzda xatlov qilingan bo‘lib, qarzdorlik bazadan chiqarilgan.
Akbar Ahrorov Samarqand shahar elektr ta’minoti korxonasi Siyob hududi korxonalar bilan ishlash muhandisi vazifasida faoliyat ko‘rsatgan. 2020-yil 26-sentabr kuni Samarqand shahar G‘ijduvon ko‘chasi 19-uyda yashovchi fuqaro F.Toshtemirovga nisbatan elektr energiyasidan foydalanish qoidalarini buzgani uchun dalolatnoma rasmiylashtirilgan bo‘lib, noqonuniy iste’mol qilingan elektr energiyasi uchun 2,2 million so‘m qarzdorlik hisoblangan. Fuqaro F.Toshtemirov A.Ahrorovga murojaat qilgan, u fuqaroning uyiga ishchilarini jo‘natgani hamda ular 1,1 million so‘m evaziga elektr hisoblagichni to‘g‘ridan to‘g‘ri ulab bergani aniqlangan.
“Samarqand hududiy elektr tarmoqlari” AJ rahbariyati tomonidan amalga oshirilgan xizmat tekshiruvi davomida bu kabi qonunbuzilish holatlari yuqorida ismi-sharifi qayd qilingan barcha xodimlar faoliyatida aniqlangan. Tekshiruv natijalari bo‘yicha aniqlangan qonunbuzilish holatlariga huquqiy baho berish uchun viloyat huquqni himoya qilish organlariga yo‘naltirilgan.
Viloyat elektr tarmoqlari korxonasi kasaba uyushmasi qo‘mitasi hisobchisi U.Mallayev ham o‘z faoliyatida qonunbuzilish holatlariga yo‘l qo‘ygani, jumladan, korxona rahbarining xabari va roziligisiz U.Mallayev korxona hisobidan pul mablag‘larini xarajat qilgani aniqlangan.
“Samarqand hududiy elektr tarmoqlari” AJ tomonidan xodimlarni o‘z vazifasidan bo‘shatishda Mehnat kodeksining 100, 102 va 108-moddalari (mehnat shartnomasini ish beruvchining tashabbusi bilan bekor qilish, mehnat shartnomasini ish beruvchining tashabbusi bilan bekor qilish to‘g‘risida ogohlantirish, mehnat daftarchasini va mehnat shartnomasining bekor qilinishi haqidagi buyruqning nusxasini berish) talablariga rioya qilinmagani ta’kidlangan.
Yuqorida nomlari keltirilgan fuqarolarning barchasi Mehnat kodeksining 100-moddasiga asosan mehnat intizomini qo‘pol ravishda buzgani sababli vazifasidan ozod qilingan.
Mazkur xodimlar “Samarqand hududiy elektr tarmoqlari” AJ xodimlar bilan ishlash bo‘limi tomonidan ogohlantirish xatlari va buyruqlar bilan tanishish hamda buyruq nushasini va mehnat daftarchasini olib ketish uchun chaqirtirilganda, kelmagani sababli amaldagi qonunchilik talablari asosida pochta aloqasi orqali ogohlantirish xatlari xodimlarning uy manzillariga yuborilgan.
Avvalroq Navoiyda koronavirusga qarshi emlanmagan 20 nafar o‘qituvchini ishdan bo‘shatmoqchi bo‘lgan direktor javobgarlikka tortilgani, Qashqadaryoda obodonlashtirish xizmatini ko‘rsatuvchi tashkilotning 171 nafar xodimiga ish haqi to‘lanmay kelgani aniqlangani to‘g‘risida xabar berilgandi.
Izoh (0)