«Самарқанд ҳудудий электр тармоқлари» корхонасининг ходимлари янги раҳбар томонидан оммавий ишдан бўшатилгани аниқланган эди. Корхона матбуот хизмати ушбу ҳолатга расмий муносабат билдирди, деб хабар беради «Дарё» мухбири.
Корхона ахборот хизматининг маълум қилишича, Самарқанд вилоят бандлик бош бошқармаси давлат меҳнат инспекцияси томонидан «Самарқанд ҳудудий электр тармоқлари» акциядорлик жамиятида ходимларни ишдан бўшатилиши борасида ўрганиш ишлари олиб борилмаган. Ўрганиш олиб бориш тўғрисида Самарқанд вилоят бандлик бош бошқармаси давлат меҳнат инспекцияси «Самарқанд ҳудудий электр тармоқлари» АЖга мурожаат қилмаган.
Ташкилотнинг фикрича, эълон қилинган мақолада ишдан бўшатилган ходимларнинг исми, шарифи ва лавозимлари, уларнинг сони кўрсатилмагани кишида гўёки «Самарқанд ҳудудий электр тармоқлари» АЖда фаолият кўрсатувчи 2375 нафар ходим ишдан бўшатилаётгандек таассурот уйғотади.
«Ваҳоланки, мазкур мақолада сўз Самарқанд шаҳар электр таъминоти корхонасида фаолият кўрсатиб келган фуқаролар Ф.Рустамов, О.Файзуллаев, У.Маллаев, О.Турдиев тўғрисида бормоқда», — дейилади муносабатда.
Таъкидланишича, мазкур фуқаролар бундан аввал ҳам интернет тармоғидаги ижтимоий саҳифаларда ўз эътирозларини баён қилган ва «Самарқанд ҳудудий электр тармоқлари» АЖ томонидан расмий муносабат билдирилган. Юқорида номлари келтирилган фуқароларнинг барчаси ўз хизмат вазифаларига совуққонлик билан ёндашгани, меҳнат интизомини қўпол равишда бузгани сабабли эгаллаб турган вазифаларидан озод қилинган.
Бундан ташқари, 107 та хонадонда жами 128 миллион сўмлик қарздорлик аниқланиб, тармоқдан узилган бўлса-да, мазкур хонадонлар электр энергиясини қайта улаб, фойдаланиб келгани аниқланган. Шунингдек, дебиторлик қарздорлиги мавжуд бўлган истеъмолчиларнинг қарздорликларини асоссиз қайта ҳисоб-китоб қилиш (қарздорликни электрон базадаги истеъмолчининг ҳисобидан ўчириш) ҳолатларига йўл қўйган.
Масалан, Самарқанд шаҳар З.Тошпўлатова кўчасида яшовчи фуқаро А.Раҳмоновнинг электр энергиясидан 6,2 миллион сўм қарздорлик аниқланиб, электрон базага киритилган бўлса-да, 2021 йилнинг 25 февраль куни ушбу маблағ асоссиз равишда қайта ҳисоб-китоб қилиниб, қарздорлик базадан чиқарилган.
О. Файзуллаев Самарқанд шаҳар электр таъминоти корхонаси Темир йўл ҳудуди электр ҳисоблагичларни алмаштириш электромонтёри вазифасида ишлаб келган. Фаолияти давомида О.Файзуллаев ҳам унга юклатилган хизмат вазифаларига совуққонлик билан ёндашиб, қатор қонунбузилиш ҳолатларига йўл қўйгани аниқланган.
Жумладан, 2020 йил 12 ноябрь куни Самарқанд шаҳар Абу Бакр Розий кўчаси 26-уй, 51-хонадонда истиқомат қилувчи фуқаро А.Раҳимовга нисбатан электр энергиясидан фойдаланиш қоидаларини бузгани учун далолатнома расмийлаштирилган бўлиб, ноқонуний истеъмол қилинган электр энергияси учун 7,9 миллион сўм қарздорлик ҳисобланган. О.Файзуллаев томонидан мазкур қарздорлик ноқонуний тарзда хатлов қилинган бўлиб, қарздорлик базадан чиқарилган.
Акбар Аҳроров Самарқанд шаҳар электр таъминоти корхонаси Сиёб ҳудуди корхоналар билан ишлаш муҳандиси вазифасида фаолият кўрсатган. 2020 йил 26 сентябрь куни Самарқанд шаҳар Ғиждувон кўчаси 19-уйда яшовчи фуқаро Ф.Тоштемировга нисбатан электр энергиясидан фойдаланиш қоидаларини бузгани учун далолатнома расмийлаштирилган бўлиб, ноқонуний истеъмол қилинган электр энергияси учун 2,2 миллион сўм қарздорлик ҳисобланган. Фуқаро Ф.Тоштемиров А.Аҳроровга мурожаат қилган, у фуқаронинг уйига ишчиларини жўнатгани ҳамда улар 1,1 миллион сўм эвазига электр ҳисоблагични тўғридан-тўғри улаб бергани аниқланган.
«Самарқанд ҳудудий электр тармоқлари» АЖ раҳбарияти томонидан амалга оширилган хизмат текшируви давомида бу каби қонунбузилиш ҳолатлари юқорида исми-шарифи қайд қилинган барча ходимлар фаолиятида аниқланган. Текширув натижалари бўйича аниқланган қонунбузилиш ҳолатларига ҳуқуқий баҳо бериш учун вилоят ҳуқуқни ҳимоя қилиш органларига йўналтирилган.
Вилоят электр тармоқлари корхонаси касаба уюшмаси қўмитаси ҳисобчиси У.Маллаев ҳам ўз фаолиятида қонунбузилиш ҳолатларига йўл қўйгани, жумладан, корхона раҳбарининг хабари ва розилигисиз У.Маллаев корхона ҳисобидан пул маблағларини харажат қилгани аниқланган.
«Самарқанд ҳудудий электр тармоқлари» АЖ томонидан ходимларни ўз вазифасидан бўшатишда Меҳнат кодексининг 100, 102 ва 108-моддалари (меҳнат шартномасини иш берувчининг ташаббуси билан бекор қилиш, меҳнат шартномасини иш берувчининг ташаббуси билан бекор қилиш тўғрисида огоҳлантириш, меҳнат дафтарчасини ва меҳнат шартномасининг бекор қилиниши ҳақидаги буйруқнинг нусхасини бериш) талабларига риоя қилинмагани таъкидланган.
Юқорида номлари келтирилган фуқароларнинг барчаси Меҳнат кодексининг 100-моддасига асосан меҳнат интизомини қўпол равишда бузгани сабабли вазифасидан озод қилинган.
Мазкур ходимлар «Самарқанд ҳудудий электр тармоқлари» АЖ ходимлар билан ишлаш бўлими томонидан огоҳлантириш хатлари ва буйруқлар билан танишиш ҳамда буйруқ нушасини ва меҳнат дафтарчасини олиб кетиш учун чақиртирилганда, келмагани сабабли амалдаги қонунчилик талаблари асосида почта алоқаси орқали огоҳлантириш хатлари ходимларнинг уй манзилларига юборилган.
Аввалроқ Навоийда коронавирусга қарши эмланмаган 20 нафар ўқитувчини ишдан бўшатмоқчи бўлган директор жавобгарликка тортилгани, Қашқадарёда ободонлаштириш хизматини кўрсатувчи ташкилотнинг 171 нафар ходимига иш ҳақи тўланмай келгани аниқлангани тўғрисида хабар берилганди.
Изоҳ (0)