Bandlik va mehnat munosabatlari vazirligi ijtimoiy tarmoqlarda tarqalgan “Samarqand hududiy elektr tarmoqlari” AJning yangi direktori xodimlarni ommaviy ravishda ishdan bo‘shatib yuborgani aytilgan videomurojaatga munosabat bildirdi.
Ijtimoiy tarmoqlarda tarqalgan videoda “Samarqand hududiy elektr tarmoqlari” aksionerlik jamiyati xodimlarini yangi tayinlangan rahbar G‘anisher Mamatqulov ommaviy tarzda, hech bir ogohlantirishlarsiz, ishdan bo‘shatib yuborilayotgani bayon qilingan.
Bandlik va mehnat munosabatlari vazirligining ma’lum qilishicha, holat yuzasidan Samarqand viloyati Bandlik bosh boshqarmasi Davlat mehnat inspeksiyasi tomonidan o‘rganish o‘tkazilgan.
O‘rganish davomida “Samarqand hududiy elektr tarmoqlari” AJ tomonidan Mehnat kodeksining 100, 102, 108-moddalari (mehnat shartnomasini ish beruvchining tashabbusi bilan bekor qilish, mehnat shartnomasini ish beruvchining tashabbusi bilan bekor qilish to‘g‘risida ogohlantirish, mehnat daftarchasini va mehnat shartnomasining bekor qilinishi haqidagi buyruqning nusxasini berish) talablariga rioya qilinmaganligi aniqlangan.
Shuningdek, maqolada ko‘rsatilgan fuqarolarning buzilgan huquqlarini tiklash maqsadida kiritgan da’vo arizalari Fuqarolik ishlari bo‘yicha Samarqand shahar sudi tomonidan ko‘rib chiqilayotgani ma’lum bo‘lgan.
Ta’kidlanishicha, o‘rganish yakunlari bo‘yicha qo‘shimcha axborot taqdim qilinadi.
Avvalroq Navoiyda koronavirusga qarshi emlanmagan 20 nafar o‘qituvchini ishdan bo‘shatmoqchi bo‘lgan direktor javobgarlikka tortilgani, Qashqadaryoda obodonlashtirish xizmatini ko‘rsatuvchi tashkilotning 171 nafar xodimiga ish haqi to‘lanmay kelgani aniqlangani to‘g‘risida xabar berilgandi.
