Қозоғистон биринчи президенти Нурсултон Назарбоев Нур Отан партияси раҳбарлигини топширишга қарор қилди. Бу ҳақда элбошининг маслаҳатчиси ва матбуот котиби Айдос Укибайга таяниб, Tengrinews хабар берди.
«Сиёсий кенгашнинг кенгайтирилган йиғилишида Нурсултон Назарбоев Нур Отан партияси раиси ваколатларини топширишга қарор қилиб, партияни мамлакат президенти бошқариши кераклигини таъкидлади. Ваколатларни топшириш тартиби партия уставига мувофиқ амалга оширилади», — деб ёзди Айдос Укибай Twitter’да.
Шунингдек, Айдос Укибай Нурсултон Назарбоевнинг партия раҳбарлигидан кетиш ҳақидаги қарорини изоҳлаган.
«Тушуниш керакки, Нурсултон Абишевич эгаллаб турган лавозими ва ҳокимиятдаги мансабидан қатъи назар, халқимиз етакчиси – элбоши, замонамизнинг атоқли сиёсатчиси, жаҳон ҳамжамияти томонидан тан олинган нуфузли шахс бўлиб қолади.
Ўйлайманки, замонавий Қозоғистоннинг барпо этилиши замирида турган, ўз ватани учун жонини аямайдиган, унга бутун умрини бағишлаган инсон доимо эл-юрт манфаати, миллат, бутун юрт келажаги учун илдиз отиб яшашини ҳамма тушунади. Элбошининг бу ақидаси ўзгаришсиз қолмоқда», — деди Айдос Укибай Tengrinews’га.
Унинг қайд этишича, Назарбоевнинг бугунги қарори ҳокимиятни топширишнинг мантиқий давоми, холос.
«Нурсултон Назарбоев таъкидлаганидек, Нур Отан партияси, айниқса, пандемия туфайли юзага келган глобал инқироз шароитида Қозоғистон президентининг асосий таянчи бўлиши лозим. Партия уставига мувофиқ, унинг раисини сайлаш ва лавозимидан озод этиш Нур Отан партияси съездининг мутлақ ваколатига киради. Ўша пайтгача Нурсултон Назарбоев партия раиси бўлиб қолади», — дея қўшимча қилди элбошининг маслаҳатчиси.
Аввалроқ Нурсултон Назарбоев умуртқасини операция қилдиргани Қозоғистон президенти лавозимидан кетишининг сабабларидан бири эканини тан олганди.
Изоҳ (0)