“Portretga chizgilar. Lider” hujjatli filmida Qozog‘iston birinchi prezidenti Nursulton Nazarboyev O‘zbekiston bilan chegarani shakllantirish tarixi haqida so‘zlab berdi, deb yozmoqda “Gazeta.uz”. Video 1-iyul kuni Nursulton Nazarboyevning YouTube’dagi rasmiy kanalida e’lon qilingan.

Foto: Videodan kadr

“O‘zbekiston bilan chegaralar mana bunday o‘tgandi, — deya tushuntirgan Nursulton Nazarboyev qo‘li bilan to‘lqinli chiziq chizib. — Ba’zi joylarda chegara uy bo‘yicha o‘tgandi: yotoqxona O‘zbekiston tomonida, oshxona esa Qozog‘iston tomonida qolardi. Yoki qozoqlar yashaydigan butun qishloq O‘zbekistonda edi, ammo ular O‘zbekistonda bo‘lishni xohlaydi. Yoki u yerda o‘zbeklar bo‘lardi. Ammo qozoqlar Qozog‘istonda bo‘lishni xohlagan holatlar ko‘proq edi”.

Uning so‘zlariga ko‘ra, u O‘zbekiston Birinchi Prezidenti Islom Karimovga hududlarni almashishni taklif qilgan.

“Men kel, bunday qilaylik dedim, — deydi Nazarboyev barmog‘i bilan yoy shaklini chizib, — senga ham boshqa joydan shuncha hududni beramiz dedim. Qisqartirmaymiz, sen hech narsa yo‘qotmadim deyishing mumkin. Shunday qilib u yerda ham bunday masalalarni hal qilardik”, — degan u.

Nursulton Nazarboyev 1996-yilda qurilgan Chordara suv ombori bo‘yicha muzokaralar tafsilotlariga ham to‘xtalib o‘tdi.

“Sovet Ittifoqi parchalanganda, xaritaga qarasangiz, janubiy Qozog‘istonda Maqtaral viloyati O‘zbekiston hududiga juda aniq kirib borgan. Bizning Chordara suv omborimiz bor, lekin suv omborining inshooti, to‘g‘onning o‘zi O‘zbekistonniki edi. Men qanaqasiga endi dedim. Kel, bu masalani hal qilamiz. Bu janjal toshi bo‘ladi. Suv ombori bizga, suvning barcha richagi senga dedim. Kelishdik. Mayli, biz dambaning mana bu joyini beramiz. Qizilo‘rda viloyatida bizga tegishli hududni berdik. Va bu juda qiyin o‘tdi”, — degan u.

Uning so‘zlariga ko‘ra, Islom Karimov bilan kelishish juda qiyin edi.

“Aytish noqulay, endi u, mening qadrli do‘stim Islom Karimov bu yorug‘ dunyoda yo‘q, uning har doim o‘z qarashi bo‘lgan. U bilan kelishish juda qiyin edi. U doim hamma narsaga o‘z fikrini bildirardi. Lekin shunday holatlar ham bo‘lgan, bir safar menga qo‘ng‘iroq qilib, ‘oldingga bormoqchiman’ dedi. Men: ‘Menga qara, kun tartibini tayyorlash kerak, nima haqda gaplashamiz, tayyorgarlik ko‘rish kerak’, — dedim. ‘Hech qanday kun tartibi yo‘q, shunchaki, sen bilan ko‘rishishim kerak, tamom vassalom’, — dedi. Uni kutib oldim. Umuman olganda, u qalban yumshoq va yaxshi inson edi, biroq shunday fe’lli. U keldi, kechqurun o‘tirdik, kunduzi suhbatlashdik, masalalarni muhokama qildik. O‘shanda juda qiziq damlar bo‘lgan”, — deya xotirlaydi Qozog‘iston birinchi prezidenti.

Nursulton Nazarboyev mamlakatni qariyb 30 yil boshqarib, 2019-yilning 19-martida vakolatini topshirganini e’lon qildi. Respublikaga Qosim-Jo‘mart To‘qayev yangi prezident bo‘ldi. 6-iyul kuni Nazarboyev 81 yoshni qarshiladi. Uni O‘zbekistonning amaldagi Prezidenti Shavkat Mirziyoyev telefon orqali tabrikladi.