Yaponiya AQSh so‘rovidan so‘ng davlat neft zaxiralarini bo‘shatish imkoniyatini ko‘rib chiqmoqda, deb yozadi Reuters.
Yaponiya hukumatidagi uch nafar manbaning Reuters agentligiga aytishicha, Vashingtonning neft narxi oshishi bilan kurashish uchun muvofiqlashtirilgan choralar ko‘rish haqidagi iltimosidan so‘ng, Yaponiya hukumati zarur bo‘lgan minimal miqdordan oshiq ulushning bo‘shatilishini muammoga qonuniy yechim sifatida ko‘rmoqda.
Yaponiyada neft zaxiralarining ikki turi mavjud: davlat zaxirasi — uning hajmi Yaponiyaga 90 kun ichida import qilinadigan neft miqdoriga teng; korporativ zaxiralar — ularning hajmi 70 kunlik iste’mol uchun zarur bo‘lgan neft miqdoridan kam bo‘lmasligi kerak.
Qayd etilishicha, Yaponiya qonunchiligi neft taqchilligi yoki tabiiy ofat sodir bo‘lgan taqdirda neft zaxiralarini foydalanishga chiqarish uchun ruxsat beradi, biroq zaxiralarni narxlar oshishiga qarshi turish uchun bo‘shatish ko‘zda tutilmagan.
Reuters manbalaridan biri AQSh so‘roviga javoban “nimadir o‘ylab topishdan boshqa chora yo‘q”ligini bildirgan.
Yaponiya Vazirlar Mahkamasi bosh kotibi Xirokazu Matsuno 22-noyabr kuni hali hech narsa hal qilinmaganini bildirdi. O‘z navbatida bosh vazir Fumio Kisidaning ta’kidlashicha, hukumat qonuniy ravishda qanday yo‘l tutishi mumkinligini ko‘rib chiqmoqda.
Xabarlarga ko‘ra, Yaponiya hech qachon o‘zining davlat neft zaxiralarini bo‘shatmagan, neft kompaniyalari esa buni Fors ko‘rfazi urushidan keyin hamda 2011-yil mart oyidagi zilzila va sunamidan keyin amalga oshirgan.
Avvalroq AQSh prezidenti Jo Bayden ma’muriyati dunyodagi eng yirik neft iste’mol qiluvchi mamlakatlardan jahon narxlarini barqarorlashtirish uchun xom neft zaxiralarini bo‘shatish masalasini ko‘rib chiqishni so‘ragandi.
Mavzuga doir:
Izoh (0)