Япония АҚШ сўровидан сўнг давлат нефть захираларини бўшатиш имкониятини кўриб чиқмоқда, деб ёзади Reuters.
Япония ҳукуматидаги уч нафар манбанинг Reuters агентлигига айтишича, Вашингтоннинг нефть нархи ошиши билан курашиш учун мувофиқлаштирилган чоралар кўриш ҳақидаги илтимосидан сўнг, Япония ҳукумати зарур бўлган минимал миқдордан ошиқ улушнинг бўшатилишини муаммога қонуний ечим сифатида кўрмоқда.
Японияда нефть захираларининг икки тури мавжуд: давлат захираси — унинг ҳажми Японияга 90 кун ичида импорт қилинадиган нефть миқдорига тенг; корпоратив захиралар — уларнинг ҳажми 70 кунлик истеъмол учун зарур бўлган нефть миқдоридан кам бўлмаслиги керак.
Қайд этилишича, Япония қонунчилиги нефть тақчиллиги ёки табиий офат содир бўлган тақдирда нефть захираларини фойдаланишга чиқариш учун рухсат беради, бироқ захираларни нархлар ошишига қарши туриш учун бўшатиш кўзда тутилмаган.
Reuters манбаларидан бирининг айтишича, АҚШ сўровига жавобан «нимадир ўйлаб топишдан бошқа чора йўқ».
Япония Вазирлар Маҳкамаси бош котиби Хироказу Мацуно 22 ноябрь куни ҳали ҳеч нарса ҳал қилинмаганини билдирди. Ўз навбатида бош вазир Фумио Кисиданинг таъкидлашича, ҳукумат қонуний равишда қандай йўл тутиши мумкинлигини кўриб чиқмоқда.
Хабарларга кўра, Япония ҳеч қачон ўзининг давлат нефть захираларини бўшатмаган, нефть компаниялари эса буни Форс кўрфази урушидан кейин ҳамда 2011 йил март ойидаги зилзила ва цунамидан кейин амалга оширган.
Аввалроқ АҚШ президенти Жо Байден маъмурияти дунёдаги энг йирик нефть истеъмол қилувчи мамлакатлардан жаҳон нархларини барқарорлаштириш учун хом нефть захираларини бўшатиш масаласини кўриб чиқишни сўраганди.
Изоҳ (0)