Italiya Moliya gvardiyasi noqonuniy migratsiya va fohishalikdan pul ishlab kelgan Nigeriya jinoiy guruhiga a’zo 40 kishini hibsga oldi. Bu haqda gvardiya ma’lumotlariga tayanib, “RIA Novosti” xabar berdi.
Sardiniyaning Kalyari shahridagi Moliya gvardiyasi boshqarmasining 600 ga yaqin xodimi ushbu yirik operatsiyada ishtirok etgan. Qayd etilishicha, hibsga olish ishlari va tintuvlar Italiyaning bir qator hududlarida o‘tkazilgan.
“Pul yuvish, noqonuniy migratsiyaga yordam berish, odam savdosi, odamlarni qulga aylantirish hamda fohisha sifatida foydalanish bilan shug‘ullanuvchi Nigeriya jinoiy tashkiloti tugatildi”, — deyiladi xabarda. Hibsga olinganlardan tashqari, shaxs erkinligiga qarshi xalqaro miqyosdagi jinoyatlarga aloqador bo‘lgan “keng tarmoq”ning ko‘plab a’zolari ustidan ham tergov olib borilmoqda, bunday jinoyatlar ayblovni og‘irlashtiruvchi omil hisoblanadi.
Operatsiya tafsilotlari mafiya va terrorizm bo‘yicha milliy prokuror Federiko Kafiero de Rao ishtirokida Rimda bo‘lib o‘tadigan maxsus matbuot anjumanida ma’lum qilinadi.
Avvalroq Italiyada mafiya guruhlariga qarshi so‘nggi 30 yil ichidagi eng yirik sud jarayonida Kalabriyadagi “Ndragenta” jinoiy tashkilotining 70 nafar a’zosiga hukm o‘qilgandi.
6-noyabr kungi sud majlisida 91 nafar ayblanuvchi ishtirok etgan. Natijada ularning 21 nafari aybsiz deb topilgan, qolganlari 20 yilgacha ozodlikdan mahrum etilgan. Shov-shuvlarga sabab bo‘lgan mazkur jarayon davomida 355 kishiga — “Ndrangeta” mafiya guruhining a’zolari, shuningdek, ularning sheriklari deya taxmin qilingan shaxslarga ayblov e’lon qilingan. Ular orasida siyosatchilar va politsiya xodimlari ham bor. Gap qotillik, bosqinchilik, giyohvand moddalar savdosi, pul yuvish va xizmat mavqeyini suiiste’mol qilish kabi jinoyatlar haqida ketmoqda.
Izoh (0)