Liverpuldagi taksida sodir bo‘lgan portlashdan so‘ng Buyuk Britaniya hukumati terrorchilik xavfi darajasini “sezilarli”dan “jiddiyga” — besh balli shkalaning to‘rtinchi darajasiga ko‘tardi, deb xabar beradi “Korrespondent.net”.
“Bu shuni anglatadiki, terrorchilik hujumlari yuqori darajada sodir bo‘lishi mumkin”, — deydi mamlakat ichki ishlar vaziri Priti Patel 15-noyabr kuni o‘tkazilgan yig‘ilishda.
Mamlakat bosh vaziri Boris Jonson Buyuk Britaniya “terrorchilar o‘zini qo‘rqitishiga yo‘l qo‘ymasligi” haqida ogohlantirgan. “Biz hech qachon aqlbovar qilmas jinoyat yordamida parchalamoqchi bo‘lganlarga yon bosmaymiz”, — deydi Jonson.
Ta’kidlanishicha, 14-noyabr kuni Liverpulda sodir etilgan portlashni politsiya terakt sifatida tergov qilmoqda. Aksilterror bo‘linma vakili Rass Jeksonning ma’lum qilishicha, gumonlanuvchi terrorchining shaxsi aniqlangan, ammo tergov manfaatlari sabab uning ismi oshkor etilmayapti.
Liverpuldagi klinika yonidagi portlash
14-noyabr kuni tongda Liverpuldagi akusherlik va ginekologiya klinikasi yonida qo‘lbola portlovchi qurilma o‘rnatilgan taksi portlab ketdi. Natijada “shubhali harakatlari” uchun haydovchi tomonidan mashina ichiga qamab qo‘yilgan yo‘lovchi halok bo‘lgan. Politsiyaning aksilterror bo‘linmasi ma’lumotlariga ko‘ra, portlovchi qurilmani qurbonning o‘zi tayyorlagan. Taksichi yengil jarohat olgan.
Portlash Xotira kunida — halok bo‘lgan britaniyalik harbiy xizmatchilar xotirasiga bir daqiqalik sukut saqlashdan oldinroq sodir bo‘lgan. Versiyalardan biriga ko‘ra, yo‘lovchi mashinani Liverpul markazidagi kafedral sobor yonida portlatmoqchi bo‘lgan, ammo taksi binoga yaqinlasha olmagan. Britaniya politsiyasi terrorchining sheriklari deya gumonlanayotgan 20—29 yosh oralig‘idagi to‘rt kishini ushlagan.
Avvalroq AQShda portlash tahdidi tufayli uchta universitet evakuatsiya qilingani to‘g‘risida xabar berilgandi.
Izoh (0)