Buyuk Britaniya hukumati sanksiyalar tufayli Xitoy elchisi Chen Szeguangga parlament binosiga kirishni taqiqladi. Bu haqda Jamoat palatasi spikeri Lindsi Xoylga tayanib, “TASS” xabar berdi.
Foto: Reuters
Parlament vakilining so‘zlariga ko‘ra, Xitoy elchisiga palata binosida uchrashuvlar o‘tkazishga ruxsat berish noo‘rin, chunki Pekin bir nechta britaniyalik deputatlarga sanksiya qo‘llagan.
“Agar ushbu sanksiyalar bekor qilinganida edi, albatta, hech qanday muammo bo‘lmasdi. Men uchrashuvlarni o‘tkazib bo‘lmaydi, demoqchi emasman. Faqat sanksiyalar amalda ekan, ularni bu yerda o‘tkazish nomaqbul deb aytaman”, — dedi Xoyl.
Xitoyning Londondagi elchixonasi Britaniya parlamentining qarorini tanqid qildi. “Bu Britaniya parlamentidagi bir qator siyosiy maqsadli shaxslarning Xitoy va Buyuk Britaniya o‘rtasidagi normal almashinuv va hamkorlikka to‘sqinlik qilish yo‘lidagi qo‘pol va razil harakati”, — deyiladi diplomatik missiyada.
Mart oyida Xitoy Tashqi ishlar vazirligi Shinjon-Uyg‘ur avtonom hududidagi inson huquqlari holati to‘g‘risida “yolg‘on va noto‘g‘ri ma’lumotlar tufayli” britaniyalik to‘qqiz kishi va to‘rtta tashkilotga qarshi sanksiyalar joriy etgandi.
O‘z navbatida AQSh, Kanada va Buyuk Britaniya uyg‘urlar huquqlari buzilishi tufayli Xitoy rasmiylariga qarshi sanksiyalar kiritgan.
