Shimoliy Koreya Tashqi ishlar vazirligi Germaniyani Koreya yarim oroli suvlariga fregat (harbiy-dengiz kemalarining bir turi) yuborgani uchun qoraladi.
KXDR TIV saytida e’lon qilingan “Noxush o‘tmishni yodga olish zarur” sarlavhali maqolada aytilishicha, Osiyo—Tinch okeani mintaqasiga harbiy kema jo‘natish KXDRga nisbatan AQSh olib borayotgan dushmanona siyosatga sheriklikni bildiruvchi ochiqdan ochiq dushmanlik harakati hamda mamlakat suverenitetiga nisbatan qo‘pol tajovuzdir.
“Germaniya o‘z harakatlarini ‘Hind—Tinch okeani mintaqasi tinchligi va xavfsizligiga hissa qo‘shishni istaymiz” degan chiroyli iboralar bilan oqlashga harakat qilmoqda, ammo bu bilan u makkor harbiy-siyosiy maqsadlarni amalga oshirish uchun ushbu mintaqaga burnini tiqish niyatida ekanini yashira olmaydi”, — deyiladi xabarda.
KXDR TIV, shuningdek, Yevropa davlatlari, jumladan, Germaniya o‘z harbiy kemalarini jo‘natib, o‘z ahamiyatini ko‘rsatishga va xalqaro obro‘sini oshirishga harakat qilayotganini, biroq bu faqat kulgiga sabab bo‘layotganini alohida qayd etdi.
“Ayniqsa, o‘tgan asrdagi o‘tmishi noxush bo‘lgan davlatlar xorijiy harbiy missiya haqida boshqalardan ko‘proq bosh qotirishi zarur. O‘tkir keskinlik holatida bo‘lgan qaynoq nuqtadagi har qanday harbiy harakat, ozgina ehtiyotsizlik bilan qaytarib bo‘lmas oqibatlarga olib kelishi mumkin va agar kelajakda vaziyat yanada og‘irlashsa, Germaniya hech qanday holatda buning uchun javobgarlikdan qutilolmaydi”, — deyiladi maqolada.
5-noyabr kuni Germaniya harbiy-dengiz kuchlarining “Bavariya” fregati Sharqiy Xitoy dengizi va Yaponiya suvlarida noqonuniy dengiz faoliyatini kuzatish uchun Tokioga yetib kelgan edi.
Izoh (0)