“Tolibon” Afg‘onistonning Qandahor shahrida IShIDning uch nafar jangarisini yo‘q qildiю Otishmada, shuningdek, ikki nafar tinch aholi vakili halok bo‘ldi. Bu haqda 15-noyabr kuni “Tolibon” Ichki ishlar vazirligi matbuot markazi rahbari Qori Said Hostiy Twitter’da ma’lum qilgan, deb yozadi “Interfaks”.
Hostiyning so‘zlariga ko‘ra, tozalash operatsiyasi Qandahordagi shifoxona yaqinida o‘tkazilgan. Hodisa natijasida toliblar orasida qurbonlar yo‘q, deya qo‘shimcha qildi u.
Bundan tashqari, Afg‘oniston ommaviy axborot vositalari “Tolibon” politsiyasining rasmiy vakili Mobin Xonga tayanib xabar berishicha, Kobulning, asosan, hazora-shialar yashovchi Kote Sangi hududida 15-noyabr kuni ertalab portlash sodir bo‘lgan, oqibatda ikki tinch fuqaro yaralangan.
“Yo‘l chetiga o‘rnatilgan bomba portlab ketdi. Natijada ikki hamyurtimiz jarohat oldi”, — degan “Tolibon” vakili Aamaj News nashriga.
Noyabr boshida Kobuldagi Sardor Muhammad Dovud Xon nomli harbiy shifoxonaning kirish qismida noma’lum shaxs o‘zini portlatib yuborgan edi. U bilan birga kamida 15 kishi halok bo‘lgan. IShID terrorchilik tashkiloti ushbu portlash bo‘yicha mas’uliyatni o‘z zimmasiga oldi.
Eslatib o‘tamiz, Afg‘oniston razvedka xizmatining AQShda malaka oshirgan bir necha sobiq xodimlari, shuningdek, yuqori harbiy qismlari IShIDning Afg‘onistondagi bo‘limi safiga qo‘shilgan. The Wall Street Journal nashriga ko‘ra, ular Amerika qo‘shinlari olib chiqib ketilgach, o‘z holiga tashlab qo‘yilgani va “Tolibon” ta’qibiga uchrayotgani tufayli shunday qilmoqda. Xabarlarga ko‘ra, “Tolibon” harakati sobiq hukumatda ishlaganlarning barchasiga amnistiya va’da qilgan bo‘lsa-da, aslida ularga qarshi repressiyalarni davom ettirmoqda.
Avvalroq Iroq razvedka bo‘linmalari mamlakat g‘arbidagi Anbar viloyati cho‘lida IShID yetakchilaridan birini yo‘q qilgan edi. Bundan tashqari, xavfsizlik kuchlari radikallarning uchta boshpanasini vayron qilgan.
Mavzuga doir:
Izoh (0)