Turkmaniston prezidenti Gurbanguli Berdimuhamedov Istanbulda bo‘lib o‘tgan Turkiy kengashdagi ishtirokidan so‘ng Turkmanboshi shahriga keldi, deb yozadi “Xronika Turkmenistana”.
Nashrning Turkmaniston davlat axborot agentligiga tayanib, xabar berishicha, 13-noyabr kuni Berdimuhamedov Kaspiy dengizi sohilida joylashgan sport majmuasida bosh vazir o‘rinbosarlari bilan birga mini-futbol o‘ynagan.
So‘ng Turkmaniston prezidenti shaharda barpo etilayotgan 400 o‘rinli shifoxona qurilishini ko‘zdan kechirgan. Yetti qavatli tibbiyot majmuasining tuzilishi davlat rahbariga “planshet va modellar orqali” ko‘rsatildi, deyiladi xabarda.
Shundan so‘ng Berdimuhamedov ayrim bosh vazir o‘rinbosarlari, Transport va kommunikatsiyalar agentligi rahbari, sog‘liqni saqlash vaziri bilan amaliy yig‘ilish o‘tkazgan.
Turkmanboshi sharidagi “Avaza” Milliy turistik zonasida yirik xalqaro tadbirlar o‘tkazilayotgani bois, davlat rahbari bu yerda turli maqsadlardagi obyektlar qurishni davom ettirish bo‘yicha ko‘rsatmalar bergan. Gurbanguli Berdimuhamedov qurilayotgan shifoxona sog‘liqni saqlash sohasida xalqaro ahamiyatga molik tadbirlarni o‘tkazuvchi markazga aylanishi kerakligini ta’kidlagan.
Uchrashuvdan so‘ng prezident Turkmaniston poytaxtiga uchib ketgan.
7-avgust kuni Berdimuhamedov “Avaza”da joylashgan “Avaza” sport majmuasiga o‘g‘li Serdar Berdimuhamedov bilan birga borgandi. U yerda davlat rahbari trenajyorlarda bir nechta mashqlarni bajargan.
Avvalroq Gurbanguli Berdimuhamedov Ashxobod yaqinidagi tumanlardan biriga safari chog‘ida o‘zining to‘pponchadan o‘q uzish mahoratini namoyish etgandi. “O‘q otish maydonida davlat rahbari nishonga bir necha bor o‘q uzdi va barcha o‘qlar nishon markaziga tegdi, bu millat yetakchisining yuksak mahoratidan dalolatdir”, — deyiladi xabarda.
An’anaga ko‘ra, Berdimuhamedov nishonga dastxat qoldirgan.
Izoh (0)