Shvetsiya bosh vaziri Stefan Lyoven iste’foga chiqish to‘g‘risida ariza berdi, deb yozmoqda “RIA Novosti”.
“Shvetsiya bosh vaziri Stefan Lyoven chorshanba (10-noyabr) kuni iste’foga chiqdi, ko‘pchilik kutgan ushbu qadam kelgusi yilgi umumiy saylovlar oldidan uning vorisi Magdalena Anderssonga yo‘l ochadi”, — deyiladi Frans Press xabarida.
O‘tgan hafta Shvetsiya moliya vaziri Magdalena Andersson mamlakatning hukmron Sotsial-demokratik mehnat partiyasi raisi lavozimiga saylangandi. Agar maslahatlashuvlar va ovoz berishlar yakunida parlament uni qo‘llab-quvvatlasa, kelajakda Andersson qirollikning birinchi ayol bosh vaziri bo‘lishi mumkin.
Lyoven 2012-yilda Shvetsiya Sotsial-demokratik partiyasi rahbarligini egallagan. Uning qo‘l ostida partiya 2014- va 2018-yillardagi ikkita saylovda g‘alaba qozongan. Biroq so‘nggi paytlarda partiyaning pozitsiyasi tushib ketdi, bu Shvetsiya fuqarolari o‘rtasida o‘tkazilgan so‘rov natijalarida ham o‘z aksini topdi. Avgust oyida bosh vazir 2022-yilgi saylovlar oldidan partiyaga yangi rahbar kerakligini aytgandi.
Magdalena Andersson 2014-yilda Shvetsiya moliya vaziri lavozimini egallab, hukumatda mazkur vazifa yuklatilgan birinchi ayol bo‘lgan.
Avvalroq Kanadada qishloq xo‘jaligi vaziri ichkilikbozlik sabab iste’foga chiqqani, Ukrainada esa bosh vazirning ikki o‘rinbosari o‘z lavozimini tark etgani haqida xabar berilgandi.
Izoh (0)