Ukraina bosh vazirining o‘rinbosari, vaqtincha bosib olingan hududlarni reintegratsiya qilish vaziri Aleksey Reznikov iste’foga chiqish to‘g‘risida ariza berdi. Bu haqda Oliy Radadagi Vazirlar Mahkamasi vakili Taras Melnichukga tayanib, “RBK” xabar berdi.
“Hukumat a’zosi – Ukraina bosh vazirining o‘rinbosari – Ukrainaning vaqtincha bosib olingan hududlarini reintegratsiya qilish vaziri Reznikov A.Y. o‘z xohishi bilan iste’foga chiqish to‘g‘risida ariza berdi. Ariza Oliy Rada apparatida ro‘yxatga olindi”, — deb yozdi Melnichuk o‘zining Telegram kanalida.
Avvalroq “Ukraina haqiqati” manbalari Ukraina Vazirlar Mahkamasida kadrlar o‘zgarishi kutilayotgani haqida xabar bergan. Ularga ko‘ra, Reznikov Andrey Taranning o‘rniga mudofaa vaziri etib tayinlanadi. O‘z navbatida, bosh vazir o‘rinbosari lavozimini “Xalq xizmatkori” deputati Irina Vereshchuk egallaydi.
“Xalq xizmatkori” fraksiyasining rahbari David Araxamiyaning so‘zlariga ko‘ra, Taran sog‘lig‘idagi muammolar va tezkor islohotlar o‘tkazish zarurati tufayli mudofaa vaziri lavozimini Reznikovga topshiradi.
“Janob Reznikov uchun, menimcha, mudofaa ta’minoti sohasidagi qoidalar sezilarli darajada o‘zgarganini hamma tushunadi. Mudofaa vazirligi esa keskin o‘zgarishlarga muhtoj. Janob Taran bilan kelishilgan holda, uning sog‘lig‘i, qolaversa, Mudofaa vazirligi turbo rejimiga muhtoj bo‘lgani sababli, bu o‘zgarishlarning barchasiga rahbarlik qila oladigan tajribali rahbar izlashga to‘g‘ri keldi. Aslida, Reznikov o‘zining professionalligi, diplomatiyasini allaqachon isbotlab bo‘lgan va xalqaro hamkorlar orasida obro‘-e’tiborga ega”, — dedi Araxamiya.
Bundan tashqari, Vazirlar Mahkamasi tarkibiga ham bir qator o‘zgarishlar kiritilishi rejalashtirilgan. Xususan, ekologiya vaziri Roman Abramovskiyning o‘rnini uning o‘rinbosari Ruslan Strelets, bosh vazirning yana bir o‘rinbosari Oleg Uruskiyning o‘rnini esa Davlat bojxona xizmati rahbari Pavel Ryabikin egallaydi, deya xabar berdi “Ukraina haqiqati” manbalari.
Reznikov “RBK Ukraina”ga iste’foga chiqqanini tasdiqladi. Nashr uning bayonoti nusxasini oldi. Keyinchalik Melnichuk Uruskiy ham iste’foga chiqish haqida ariza yozganini ma’lum qildi.
Reznikov 2020-yilning mart oyida bosh vazir o‘rinbosari – Ukrainaning vaqtincha bosib olingan hududlarini reintegratsiya qilish vaziri etib tayinlangan edi. Rossiya Davlat Dumasi uni qidiruvga berishni talab qilgan. Bunga vazirning Qrimga Ukraina nazorat punktlari orqali ko‘chib o‘tmagan rossiyalik, agar yarim orol Ukrainaga qaytsa, deportatsiya qilinishi haqidagi so‘zlari sabab bo‘lgan. Bunday shaxslar qonunbuzarlar sanaladi va “quvib chiqarilishi” mumkin, degan u.
Qrim respublikasi senatori, Federatsiya Kengashining xalqaro ishlar bo‘yicha qo‘mitasi a’zosi Sergey Sekov Reznikovning so‘zlariga izoh berar ekan, “Ukrainadagi va xorijdagi barcha aqli raso odamlar bu (deportatsiya) hech qachon sodir bo‘lmasligini tushunadi”, — dedi. Uning ta’kidlashicha, yetti yil ichida 300 mingdan ko‘proq odam, shu jumladan, 100 mingga yaqin Ukraina fuqarolari Qrimga ko‘chib o‘tgan va Reznikov “bu haqda bilmaydi”. “U jiddiy o‘rinbosar, lekin bema’ni gaplarni aytadi”, — deya qo‘shimcha qilgan Sekov.