Швеция бош вазири Стефан Лёвен истеъфога чиқиш тўғрисида ариза берди, деб ёзмоқда «РИА Новости».
«Швеция бош вазири Стефан Лёвен чоршанба (10 ноябрь) куни истеъфога чиқди, кўпчилик кутган ушбу қадам келгуси йилги умумий сайловлар олдидан унинг вориси Магдалена Андерссонга йўл очади», — дейилади Frans Press хабарида.
Ўтган ҳафта Швеция молия вазири Магдалена Андерссон мамлакатнинг ҳукмрон Социал-демократик меҳнат партияси раиси лавозимига сайланганди. Агар маслаҳатлашувлар ва овоз беришлар якунида парламент уни қўллаб-қувватласа, келажакда Андерссон қиролликнинг биринчи аёл бош вазири бўлиши мумкин.
Лёвен 2012 йилда Швеция Социал-демократик партияси раҳбарлигини эгаллаган. Унинг қўл остида партия 2014- ва 2018 йиллардаги иккита сайловда ғалаба қозонган. Бироқ сўнгги пайтларда партиянинг позицияси тушиб кетди, бу Швеция фуқаролари ўртасида ўтказилган сўров натижаларида ҳам ўз аксини топди. Август ойида бош вазир 2022 йилги сайловлар олдидан партияга янги раҳбар кераклигини айтганди.
Магдалена Андерссон 2014 йилда Швеция молия вазири лавозимини эгаллаб, ҳукуматда мазкур вазифа юклатилган биринчи аёл бўлган.
Аввалроқ Канадада қишлоқ хўжалиги вазири ичкиликбозлик сабаб истеъфога чиққани, Украинада эса бош вазирнинг икки ўринбосари ўз лавозимини тарк этгани ҳақида хабар берилганди.
Изоҳ (0)