AQShning sobiq prezidenti Barak Obama Rossiya va Xitoyni iqlim muammolarini hal etishga yetarlicha kuch sarflamayotganlikda ayblab, ikki mamlakat yetakchilarini Glazgoda o‘tkazilgan iqlim bo‘yicha konferensiyaga kelmagani uchun tanqid qildi, deb xabar beradi “RBK”.
“Atmosferaga chiqariladigan zararli chiqindilarning eng yirik manbalari hisoblanuvchi Rossiya va Xitoy yetakchilari hatto yig‘ilishlarda ishtirok etishdan bosh tortayotgani alohida xavotirga soladi, ularning mamlakatlarini rejalari esa (iqlimga salbiy ta’sirga qarshi kurash sohasida — tahr.) shoshilinch emasdek ko‘rinmoqda (iqlim masalalaridagi yechimlar — tahr.)”, — deydi Obama.
Shuningdek, u sayyorani qutqarish uchun mamlakatlar birlashishi kerakligini ta’kidlab, Donald Tramp prezidentligi davrida AQShning iqlim bo‘yicha kelishuvdan chiqib ketganini tanqid qilgan.
1—2-noyabr kunlari BMT shafeligida o‘tkazilgan iqlim konferensiyasi doirasida jahon yetakchilari sammiti bo‘lib o‘tdi, biroq unga Putin va Si Szinpin kelmagan. Rossiya prezidentining matbuot kotibi Dmitriy Peskovning tushuntirishicha, Putin videoaloqa orqali muhokamaga qo‘shilish imkoniga ega bo‘lmagani uchun sammitda so‘zga chiqmagan. Shu bilan birga, prezident konferensiya uchun o‘rmon xo‘jaligi va yerdan foydalanishni boshqarish bo‘yicha videomurojaat yo‘llagan. U Moskva sammit ishtirokchilarining deklaratsiyasini qo‘llab-quvvatlashini va o‘rmon resurslaridan uglerod neytralligi yo‘lida foydalanilishini ma’lum qilgan.
Sammit davomida AQSh prezidenti Jo Bayden Rossiya va Xitoy yetakchilarining tadbirga kelmaslik to‘g‘risidagi qarorini xato deb atagan. U Putinning “tundrasi tom ma’noda yonayotgani”ga e’tibor qaratgan. Uning so‘zlariga ko‘ra, Rossiya prezidenti mamlakatda iqlim bilan jiddiy muammolar borligi fonida “biror chora ko‘rish haqida sukut saqlamoqda”.
Peskov Rossiyada o‘rmonlar yonayotganini tan olgan, biroq buni ko‘plab davlatlarda kuzatilayotgan iqlim o‘zgarishi deya tushuntirgan. Kreml vakilining ta’kidlashicha, Kaliforniyada ham o‘rmonlan yonmoqda. U Moskva Glazgodagi sammitning mohiyatini tushinishini va iqlim masalalari bo‘yicha izchil harakat qilishini qo‘shimcha qilgan.
COP26 Buyuk Britaniyaning Glazgo shahrida 31-oktabrda boshlangan va 12-noyabrgacha davom etadi. Unda 200 ga yaqin davlatdan vakillar ishtirok etishi kutilmoqda. Iqlim bo‘yicha sammit doirasida dastlab dunyoning 100 dan ortiq yetakchilari 2030-yilga borib o‘rmonlarning yo‘qolib ketishi jarayonini to‘xtatishga kelishib oldi.
Eslatib o‘tamiz, iqlim bo‘yicha sammit boshlanishidan bir necha kun oldin Glazgo shahrida kuchli yomg‘ir yog‘ib, ko‘chalarni suv bosgan edi.
Avvalroq BMTning iqlim sammitida 40 dan ortiq davlat ko‘mirdan foydalanishni kamaytirish to‘g‘risida shartnoma imzolagani, Britaniya bosh vaziri iqlim o‘zgarishiga qarshi kurashda insoniyat oldida uzoq yo‘l turganini aytgani, Zelenskiy Qrim va Donbassni “Yevropa markazidagi ekobombalar” deb atagani to‘g‘risida xabar berilgandi.
Izoh (0)